Campanja di FADA demostra cu nos mester fortifica e famianan 

ORANJESTAD -- Partido MEP tambe a participa na e siman di concientisacion di FADA.
"E problema di adiccion na Aruba ta hopi serio, y especialmente hopi alarmante bou nos hobennan. Pesey nos ta sostene e iniciativa di FADA pa aumenta concientisacion riba e tema aki.
Nos a bishita FADA, y nos a duna nos aporte prome cu e campanja a cuminsa. Y den e siman di campanja tambe nos a participa activamente.
Papiando cu hobennan den e dianan aki riba e tema aki, mi por a constata cu den mayoria di caso un hoben ta recuri na droga pasobra e no ta haya atencion y cuido na cas, den algun caso su mayornan tambe ta adicto. Hopi problema ta wordo ocasiona pasobra e mayor no tin trabou, y problemanan social ta aumenta. E hoben ta haya consuelo den gang y asina ta cai den adiccion.
Ta tempo pa aki na Aruba nos realisa cu e problemanan aki mester wordo atendi cu seriedad, caminda e nucleo familiar ta wordo poni central. Ban fortifica nos famianan. Ban yuda e mama y e tata cu tin problema pa por funciona y duna guia y disiplina na su yiu.
E gobierno aki a crea diferente ministerio y departamento, pero no a soluciona e problema. E problema a bira mas grandi pasobra e ministerionan di famia, hoben, hende muher y nos grandinan ta hala for di otro y no ta comunica cu otro. Na final ta e mucha ta wordo perhudica. Aruba mester un ministerio central di famia, y bou di e ministerio ey mester bin e departamento di hoben, di hende muher, di famia, di nos grandinan etc. Ta asina so nos lo por brinda cabes na e problemanan social cu cada biaha ta birando mas grandi. Y ta hunto nos mester traha pa eradica adiccion di droga, y ohala cu berdad pronto nos por bira un isla 'drugs free'. Mi ta felicita FADA cu e campanja exitoso un biaha mas", Evelyn Wever-Croes a bisa na final.

Expresionnan haci den e articulo aki no necesariamente ta refleha opinion di ArenaPoliti.co