ORANJESTAD - Dialuna mainta Minister di Finanzas, Angel Bermudez tabata tin un encuentro cu Minister Plasterk, pa asina combersa riba e futuro di Fondo di Desaroyo Arubano (FDA) como tambe tur proyecto cu actualmente tin pendiente te cu aña 2016. E mandatario a clarifica cu e tabata un reunion ameno unda cu a logra yega na varios palabracion pa e continuidad di e proyectonan como tambe fondonan cu mester wordo aloca.

Segun Minister Bermudez e fundacion aki cu a cuminsa 20 aña pasa y a conta cu aproximadamente 500 miyon florin. E suma aki ta fondonan cu tanto Hulanda como pais Aruba a deposita den e curso di e añanan destina pa financia diferente proyecto den un total di 7 programa cu a wordo stipula pa Aruba.

Manera ta conoci 31 di December di e aña aki FDA lo yega na e fin statutorio, pues e reunion entre Minister Bermudez y Minister Plasterk tabata uno fundamental pa yega na un acuerdo riba e futuro di e fondo aki y tur proyecto concerni. “Den cuadro di e unico punto di agenda aki nos a delibera riba diferente procedura cu mester tuma luga. Te na e momentonan aki ti mas cu 100 pa 120 miyon florin na banco ainda cu mester wordo aloca na e proyectonan cu ta den ehecucion, proyectonan cu mester bay den ehecucion ainda incluso algun cu mester bay den destaho ainda,” e mandatario a splica.

Minister Bermudez a informa cu pa evita cu e fondonan aki lo no wordo aloca pa motibo di e “cut off date”, a palabra pa posponi e fecha fatal pa aprobacion di proyectonan di FDA te cu primavera di 2016, pa asina duna e fundacion tempo pa aloca loke falta na proyectonan cu a wordo entrega pa e diferente departamentonan pero cu no a finalisa ainda e proceso di informacion of cu no a haya ainda e aprobacion pa bay den destaho.

“E temporada nobo aki lo ta disponibel pa un par di luna mas pa asina FDA por aloca e fondonan pa e proyectonan pendiente”, asina Minister Bermudez a sigura. Na mes momento e mandatario a indica cu ademas di e fondonan di FDA cu no a wordo aloca ainda, tin fondonan adicional cu lo ta disponibel na 2016 y 2017 for di e presupuesto di e añanan corespondiente.

Sin embargo Minister Bermudez a palabra cu e mandatario di Hulanda cu lo bay realisa un sucesor pa FDA, pues lo bin otro entidad legal cu lo ta encarga cu tur e bienesnan na momento di e clausura legal di e fondo aki,  mescos cu lo mantene obligacionnan pa e proyectonan cu no a caba ainda of ta den ehecucion, eseynan lo mester wordo poni bou maneho y vigilancia di otro entidad legal cu lo ta e sucesor di e FDA.

Expresionnan haci den e articulo aki no necesariamente ta refleha opinion di ArenaPoliti.co