Y ainda falta!  

Apesar di tur loke a cambia y a mehora den e ultimo seis aña, partidonan di oposicion ta sigui pinta tur cos na Aruba scur y spanta hende pa futuro. Den combersacion cu Rene Herde' a puntr'e kico tin di berdad den loke oposicion ta bisa. Esaki ta e contesta di Rene Herde', lider di e fraccion di AVP den Parlamento.

ADELANTO GRANDI DEN 6 AÑA  
"MEP no por y no kier splica ta dicon bou nan gobierno nos economia a cay cu 15%, desempleo a subi te casi 12%, dicon mas cu 6 mil hende a keda sin trabou, dicon nos pais tabata den loke expertonan a yama decadencia total. MEP no kier a ni papia di e pobresa, desolacion, falta total di perspectiva y demoralisacion den nos pais of di e corupcion  den nan gobierno cu a keda demostra den e raport di WODC."

ECONOMIA  
Rene Herde': "Den e casi seis aña cu a pasa economia di nos pais a reviva y crece cu 17% pa sali di e abismo di 15% pa yega na e 2% cu e ta awe. Desempleo a baha for di e 12% caminda MEP a bay lague na 2008, te yega 7.5% di awe. Pa nos e ta mucho halto ainda! Pesey ta sigui haci tur cos pa crera trabou. Specialmente pa hobennan."

TRAHADORNAN
Rene Herde': E riesgonan grandi pa entrada di trahadornan y pensionadonan a wordo kita. Tur dos fondo di pensioen tabata casi bay bancarota y laga mas cu 20 mil pensionado sin niun entrada. Tur dos fondo di pensioen a wordo salba y nan ta bek na e punto solido cu nan mester ta. Cu esey a segura tur e 20 mil pensionado na Aruba nan pensioen pa hopi aña den futuro. Trahadornan y nan famia a wak nan entrada bay atras cu 24% bou di gobierno di MEP y mester a paga 250% mas pa coriente den e mes un periodo di gobierno di MEP. Den e ultimo 5 aña e trahadornan a wak adelanto: esnan di gobierno y den enseñansa a bay dilanti cu 5 mil florin pa aña, nan a haya indexering pa cubri aumento di costo di bida y no a kita nada nan entrada. Nan prima di vakansi, prima di fin di aña y di comienso di aña, tur nan a keda cun'e durante di henter e crisis financiero economico. Nan pensieon ta sigura awor atrobe. Trahadornan di sector priva pa prome biaha den historia di Aruba, no a tende e gobierno bisa nan "bay serca bo doño di trabao". Nan a haya oido di gobierno di AVP. E trahadornan den sector priva cu entrada te 2500 florin pa luna a haya un suma aserca for di caha di gobierno. Tambe e trahadornan den sector priva pa prome biaha tin awor un seguro di pensioen cu ta garantisa nan un didos entrada dia cu nan baha cu pensioen. Te awor ta trahadornan di gobierno y maestronan di scol so tabata tin esey.

Oposicion
Pero apesar di tur esey, oposicion kier crea e impresion cu nada a sosode y cu cos tabata miho bou gobierno di MEP. E realidad di Aruba awe compara cu ora MEP a sali di gobierno ta contradeci totalmente loke oposicion ta bisa. Rene Herde': "MEP a bay laga nos pais den ruina y den oposicion nan ta contra di tur loke nos haci pa drecha loke nan a daña y crea un miho futuro pa nos tur. Haci mal trabou y ta contra di tur bon cu nos a haci. Danki Dios cu nan no a keda den gobierno".

Expresionnan haci den e articulo aki no necesariamente ta refleha opinion di ArenaPoliti.co