Gerick Croes (MEP): Gabinete Eman a inyecta casi nada den fondo di caretera e ultimo 3 añanan!
![Gerick05](/images/779x490/Gerick05.jpg)
Na Aruba tin hopi area habita cu camindanan cual nunca a wordo manteni of camindanan di santo cu nunca a yega di mira un capa di asfalt. Recientemente nos a bishita y pone enfasis riba e caminda cu ta conecta Pos Chikito pasa via Sabana basora , Rooi Frances pa yega Santa Cruz. E caminda aki simbolicamente ta representa tur e camindanan den tur area rond di Aruba cu ta den un estado nawerki y no conoce mantencion drechi. Logicamente e asunto aki ta di lamenta pasobra e cuidadano ta paga belasting y esaki nifica cu den principio e tin derecho di por core riba careteranan drechi. Si camindanan rond di nos pais no ta haya mantencion of camindanan di santo no ta haya asfalt ta e cuidadano ta wordo perhudica. E ta wordo perhudica den e sentido cu e mal camindanan ta sacudi bo auto di tal forma y dal abou cu consecuencia cu cada rato bo mester bai cambia piesa cualnan no ta niun tiki barata tampoco.
Pais Aruba tin un fondo special pa mantencion di caminda y pa construi nobo. E fondo aki jama Interim wegeninfrastructuur (IWIF) fonds. E ta bon pa pueblo sa cu durante e añanan 2013 te cu 2015 Gabinete Eman a inverti solamente 8.5 miyon florin den e fondo di caretera. E suma di 8.5 miyon por sona hopi, pero e ta importante pa pueblo di Aruba ta informa cu pa aña gobierno ta haya aproximadamente 21 miyon florin. E hecho cu den e 3 añanan a inyecta solamente 8.5 miyon florin den caminda siendo cu Aruba ta haya anualmente na entrada 21 miyon florin di motorrijtuigenbelasting ( dus a genera un total di 63 miyon) ta un acto condenabel. Den cifra esaki ta ekivalente na solamente 13.5% cu a wordo usa pa caminda den un periodo di 3 aña.
![AB2013 no51](/images/imagen/AB2013-no51.jpg)
![belastingopbrengsten](/images/imagen/belastingopbrengsten.jpg)
Si compara e atencion cu MEP tawata pone den e fondo aki bo lo constata diferencia grandi. Partido MEP si a inyecta 79 miyon florin durante su gobernacion cual ta ekivalente na aproximadamente 10 miyon pa aña den drecha y construi caminda mientras Gabinete Eman solamente 2.8 miyon. Ta logico e ora ey cu pueblo ta hasi e pregunta sabiendo cubo ta haya 21 miyon florin pa aña : Na unda e resto di placa aki a bai anto bou mando di AVP?
Expresionnan haci den e articulo aki no necesariamente ta refleha opinion di ArenaPoliti.co