STA CRUZ -- "Cu un asombro grandi mi a tuma nota di e ganjamento den partido AVP. Ta hendenan cu no tin tino so ta purba manipula di e forma aki", asina lider di MEP Evelyn Wever-Croes a cuminsa su declaracion.
Den Parlamento minister Bermudez a bisa cu nan calculonan ta mustra cu e ABB lo bira 7%. Esaki el'a ripiti 3 biaha. Un rato despues Mike Eman a sali y desmenti esey. Riba dje esun cu ta skibi articulo pa Mike Eman a tira culpa riba MEP, y bisa cu ta invento di MEP. Mesora MEP a prueba cu grabacion di e reunion den Parlamento, cu ta minister Bermudez a papia di ABB di 7%.
"Awor tur hende por mira con ganjado y manipulado partido AVP ta. Semper nan ta ganja, nan a ganja pa gana eleccion y awor ainda nan ta ganja. Pero mas tristo ta cu Mike Eman no por carga su responsabilidad y mester tira tur culpa semper riba MEP. Awor tur hende ta realisa cu Eman ta un persona realmente di poco caracter y dignidad, un persona cu semper a core pa su responsabilidad. Eman a compromete su mes cu Hulanda cu sea e ta bin cu ABB of e ta hisa e BBO, y awor cu Minister Bermudez a anuncia e ABB, Eman mester sali y bisa ta kiko anto.
Eman debe henter nos pueblo un splicacion dicon minister Angel Bermudez no mag di papia mas riba e tema aki. Ta desde ki tempo pueblo ta paga un minister pa hasi su trabou, pero e no mag di papia di dje? Solamente den Eman-landia talves algo asina ta posibel, pero den un pais democratico manera Aruba e minister mester carga su responsabilidad.

ANGEL BERMUDEZ MESTER TUMA SU RETIRO
Angel Bermudez no por sigi traha como minister di finansas. Si e tin un poco dignidad e ta para Mike Eman, y entrega su retiro. Si e no hasi'e, nos lo yam'e den Parlamento pa retir'e, pasobra no por ta asina cu el'a informa nos, no un, pero tres biaha, cu ABB ta bira 7%, anto despues ta resulta cu talves no ta asina. Esaki ta inaceptable.

EVELYN WEVER-CROES TA RETA MIKE EMAN
Mi ta reta Mike Eman pa papia e berdad y splica dicon el'a silencia minister Angel Bermudez, y kiko ta bai pasa awor cu finansas di nos pais", lider di MEP Evelyn Wever-Croes a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co