"E inversionnan y e renobacionnan cu nos a haci den e ultimo seis aña, a crea un plataforma cu ta duna trankilidad y un trampolin di oportunidad pa Aruba sigui haci saltonan di renobacion den calidad di nos pais y condicionnan di bida pa tur hende den futuro. E inversionnan tabata den renobacion di economia, den mercado laboral, den infrastructura, den fortifica y amplia nos sistema di seguro social, den sigura necesidadnan basico y den pone nos riba e caminda di menos dependencia di energia caro y malo pa medio ambiente. E renobacionnan aki ta duna nos ademas un adelanto significante compara cu otro paisnan. Nos mester consolida loke nos a logra te awor y us'e como base pa duna full atencion na con pa sigura adelanto di cada hende personalmente, pa cada compania, pa cada bario y cada cas." Asina Rene Herde' a bisa diabierna pasa. E ta optimista pa cu e futuro di Aruba.

FUTURO
Mientras cu tin señalnan di adelanto den mundo, tin señalnan di preocupacion. Segun Rene Herde', esey semper tabata asina. Pero e paisnan cu mas ta progresa bou di tur condicion, ta e paisnan cu ta inverti den asuntonan essencial pa pueblo y cu ta habri oportunidadnan nobo pa futuro. Rene Herde': "Esey ta exactamente loke nos a haci. E inversionnan pa cambia e forma di genera energia di petroleo caro pa energia renovabel, sin niun duda ta un di e miho escohencianan pa futuro. Nos jiunan lo ta contento cu esaki sigur. Pa futuro e ta duna nos e seguridad y e trankilidad, cu kico cu pasa cu petroleo, nos lo tin otro forma pa sigura nos pais di energia limpi , pagabel y mas stabiel. E renovacion di leynan laboral, di belasting, di leynan pa stimula inversionnan den nos economia, e renobacion di nos infrastructura basico essencial - waf, camindanan principal, hospital, aeropuerto, turismo - ta haci cu obstaculonan bieuw a wordo kita y a crea oportunidadnan economico y laboral nobo. E hospital renoba ta bon pa nos propio hendenan, pero e ta crea confiansa y trankilidad pa tur hende cu bin Aruba. Ta importante pa nan sinti nan mes sigur di bin Aruba. E renobacion di nos leynan ta duna siguridad y proteccion pa pueblo y inversionista. Nos sistema di seguro social ta probablemente un di e sistemanan mas completo y mas sigur den nos region. Pero mas importante cu tur ta cu e ta igual pa tur hende. Esey ta duna confiansa y trankilidad. Ta e cosnan aki cu nos a inverti hopi den dje, cu ta duna nos hende hoben y grandi e trankilidad y confiansa pa cu futuro. Anto esey ta sin conta loke mas tin cu bin riba tereno economico. Awor nos mester haci uzo di tur loke nos a realisa den e ultimo 6 aña y crea mas oportunidad pa tur nos hobennan y mas stabilidad pa henter nos pais. Ta pesey mi ta optimista."

Expresionnan haci den e articulo aki no necesariamente ta refleha opinion di ArenaPoliti.co