Benny Nisbet (PPA): 'Algun dia parkeer por nada na Oranjestad ta demonstra cu pueblo a rechasa 'parkeermeters' y ta demonstra cu comercio a worde perjudica !!'
E solo hecho cu un comission di caya grandi a hasi un peticion na gobierno pa instrui ARU PARKING pa duna algun dia di parkeer liber den centro di Oranjestad den luna di December ta un indicacion cu comercio di Oranjestad a sufri drasticamente despues cu parkeermeters a worde introduci.
E hecho cu Ministro Presidente Mike Eman ta anuncia esaki envez di e ministro encarga Ministro Otmar Oduber ta demonstra cu Ministro Presidente ta asina convenci cu nan situacion politico ta malo y cu E como Ministro Presidente awor kier anuncia cosnan positivo so !!
Pero realidad ta cu e pueblo di Aruba a goza di por parkeer gratis decadanan largo y e pueblo no ta sinti e necesidad cu Aruba un isla di apenas 100.000 hende lo mester funciona manera un pais di miyones. Gobierno a forza e pueblo cu un sistema di parkeer den centro di Oranjestad cu a causa un desgusto den comunidad tanto e trahador cu ta traha na Oranjestad como e pueblo/consumidornan cu kier bishita Oranjestad.
Pa colmo e hecho cu gobierno y ARU PARKING a scoge un sistema unda no tin un balansa entre e hecho cu un ciudadano kizas ta para su auto robez of no ta pin na e parkeermeter y pone un ‘klem’ na su auto un propiedad di pueblo cu costa milles di florin pa un suma di f. 2,-- of f. 4,-- . Aki no tin balans anto e personal di Aru parking NO mester worde compara cu Cuerpo di Polis…..pasobra simpelmente nan no ta. Al contrario pa majoria di pueblo nan ta worde mira como un grupo abusador…..kizas e palabranan aki ta cai duro pero asina pueblo ta papia di nan. Y ora e situacion ey ta asina y por indica na confrontacionan den futuro cu por a worde evita.
E otro aspecto ta keda e motibo pakiko a introduci parkeermeters ?
Ningun momento pa centro di Oranjestad ta miho organisa pero e motibo real ta e hecho cu gobierno di Aruba y x ministro Mike de Meza alias THE MESS a hiba un maneho fatal hincando Aruba den debenan grandi y como resultado gobierno di Aruba NO kier paga Arubus e subsidio cu rond mundo ta worde pagan a companianan cu ta ‘zorg’ pa transportacion publico. A scoge ‘parkeermeters’ como un instrument pa ranca un par di million for di saco di pueblo pa tapa malgobernacion di gabinete Mike Eman.
Pa lunas largo gobierno, Arubus y Aru parking a hasi un esfuerzo pa pretende y bende e idea cu e Sistema di parkeermeters a trece un posibilidad pa comercio di Oranjestad por bende miho !. Kada vez cu esnan cu ta opone e sistema aki a splica cu aki ta perjudica trahadornan di Oranjestad, pueblo consumidor y comercio di Oranjestad mes………..esaki a worde rechaza pa Ministro Otmar Oduber y Aru parking. Well Well…..un miho forma pa desmonstra lo contrario ta e peticion di un commission di comercio di Oranjestad pa duna algun dia di ‘free parking’ y e decision di gobierno pa tuma e decision pa duna 0cho (8) dia di free parking….anto anuncia pa Ministro Presidente.
Aruba su pueblo a conoce ‘free parking’ pa algun decada…..te ora cu e gobierno di Mike Eman a ranca e ‘free parking’ cu por a worde mira como derecho di pueblo for di pueblo. PPA ta di opinion cu henter e sistema di parkeermeters mester worde PARA anto definitivamente.
Si comercio tin t ereno PRIVA y nan kier ofrece esaki na e pueblo pa e mes dicidi si nan kier hasi uso di esaki …….ta algo otro. Pero e principio di ‘free parking’ mester regresa den centro di Oranjestad .
Pueblo di Aruba a rechasa e sistema cu ‘parkeermeters’ a worde introduci den centro di Oranjestad y esey ta perjudicando comercio seriamente !
E ultimo palabra contra e abuso aki no a worde bisa ainda !!
Aruba, 28 di November 2015 Lider Politico di PPA
BENNY NISBET,
Expresionnan haci den e articulo aki no necesariamente ta refleha opinion di ArenaPoliti.co