DEN HAAG/ORANJESTAD - Prome Minister Mike Eman tabata invita pa duna un discurso pa Genootschap Nederland Aruba na Den Haag. E titulo di su discurso tabata ‘Reto y Ambicionnan’ di Aruba, e desaroyo di e relacionnan den Reino y su vision riba futuro di Aruba dentro di Reino y region Caribense. Presidente di e Genootschap sr. Van Grieken a papia den forma elocuente di Prome Minister di Aruba, prome di a pasa palabra p’e. Despues di a bay en extenso riba e historia di Aruba su Status Aparte, cu otro aña ta celebra su di 30 aña di existencia, Eman a papia riba e situacion di Aruba na momento di a drenta gobierno na 2009 y kico su gobierno a haci pa confronta e situacion pesimo cu tabatin. Contrario na Hulanda Aruba no a scohe pa austeridad, pero pa inversion (stimulus), teniendo semper e bienestar di e comunidad na bista. Tambe Aruba a haci reformanan grandi den su sistema di pensioen.

Prome Minister Eman a splica dicon su gobierno a scohe pa inverti y no pa austerisa. E crecemento economico di Aruba despues di ciere di refineria Lago a bay compaña cu su retonan. Nos beachnan cu hotel nan dilanti y crecemento grandi di e poblacion ta algun di nan. “Esaki no ta loke Aruba kier mas. E Arubiano kier tin mas desaroyo economico, unda tin prosperidad, sin mishi cu e otro balornan, manera cohesion social, relacionnan den un comunidad mester keda manteni y tambe nos mester percura pa no perde nos identidad. Retonan grandi pa cualkier pais. Nos a scohe pa inversion. Tambe teniendo na cuenta e pensamento expresa pa Robert Kennedy: ‘Yet the country's gross domestic product (GDP) measures “everything except that which makes life worthwhile”. Eman a bisa cu a usa esaki como manual den buskeda di e modelo social economico pa Aruba. “For di oposicion caba nos a traha rapportnan con hiba Aruba dilanti basa riba calidad y no cantidad. Un crecemento economico cu ta brinda un miho forma di biba pa nos hendenan. Esaki a bira e direccion cu nos a scohe.”

“Na 2009 ora nos a drenta gobierno mundo tabata confrontando un crisis economico, unda mercadonan financiero a cay den otro. Aruba tabatin dos crisis na mes momento. IMF a yame ‘A double dip in Aruba’. Crisi mundial y ciere di Valero. Un golpi duro, sigur den Turismo. Turistanan a stop di bishita e isla, partnernan manera KLM y Carnival Cruise Lines a saca Aruba di nan iterinario. Consecuencianan di e ciere di Valero tabata devastador pa Aruba. E perdida na entrada tabata structuralmente 10%, desempleo grandi, fondo di pensioen tabata den bati bancarota y ningun hende kier a inverti den Aruba. “Mi tabata formador ora cu e director di APFA na dos occasion a bin pa bati alarma. E situacion tabata malisimo. Esaki tabata e posicion di salida di nos gobierno ora nos a tuma rienda.”

Aruba no a scohe pa austerisacion, pero pa stimulacion. Riba e situacion aki te ainda tin discusion. Hulanda, Premier Rutte, a scohe pa austerisacion. Escogencia di gobierno di Aruba tabata basa riba e hecho cu tabata kier un miho forma di biba pa su hendenan. Esaki ta e asina yama ‘verdienmodel’.  Hulanda a wordo conseha pa haci mescos. Esaki ta nifica pa percura pa loke bo haci ta na bo bentaha. “Pa Aruba esaki a nifica traha riba Turismo y mara na esaki su calidad. Ora mi a drenta gobierno tabatin un decadencia total.  Den caya grandi casi no tabata wordo inverti, mescos tabata e caso cu scolnan y areanan publico. Mester a bin un impulso grandi pa nos propio hendenan. Nos vision tabata cu mester inverti. Pasobra si sigui den e situacion cu Aruba tabata esaki lo a afecta nos economia mescos cu e poder di compra di e hendenan. Nos escogencia tabata basa caba riba nos vision con invertiendo duna aliento na nos economia. Esey tabata e decision cu nos a tuma. Nada di ‘tering naar de nering’ manera Hulanda conforme su cultura a haci. Nos a haci si reformanan grandi den pensioen tanto pa ambtenaar como pa esnan cu ta cobra AOW.”. Den e ultimo parti di su discurso Eman a splica cu cifranan e situacion actual di Aruba y e desigualdad cu ta existi den Reino.

Expresionnan haci den e articulo aki no necesariamente ta refleha opinion di ArenaPoliti.co