Prome Minister Mike Eman den su discurso nacional: “Di un situacion pesimo na 2009 Aruba awe tin aprecio y respet mundial”
ORANJESTAD- Prome Minister Mike Eman den su discurso nacional cu un bes tabata sublime a papia di meta y visionnan cu nos tur ta pone nos dilanti. Sigur na un momento crucial manera cambio di aña. Mescos cu nos, gobierno tambe tin su meta y visionnan pa por guia un pueblo y pais. El a splica tambe con dificil tabata ora su gobierno a tuma rienda pa por a a drecha un situacion pesimo y sigui cu e meta y visionnan cu su gobierno a pone su dilanti. Den algun palabra el a ilustra e situacion di e tempo ey. Un situacion cu no tabata nada bon.
“Na 2009 nos a mira y scucha cu nos wowo y oreanan conecta na nos curason; nos a mira un pais den decadencia, nos a scucha un pueblo den dolor. Nos a ora na Creador pa duna nos generacion di dirigentenan e conocemento, sabiduria y boluntad pa haci e diferencia, pa trece cambio, un vision pa nos por guia Aruba for di profundidad di decadencia y desesperacion na halturanan di speransa, optimismo y progreso. Un miho destino, uno di prosperidad sostenibel y comparti cu un y tur.
Aruba na 2009 tabata den un pleno crisis. E dolor y inquietud tabata marca nos punto di salida; no tabatin inversion den nos pais ni den nos pueblo, turismo den decadencia, avionnan y cruceronan importante no tabata bin mas, desempleo grandi, perdida di entrada, pobreza, centronan di ciudad y barionan den deterioro y abandona. Presidente di Banco Central na final di 2009 den su rapport anual a delinea nos punto di salida di e forma aki:
Futuro di e refineria y calidad di e recuperacion den sector turistico ta e factornan di mayor importancia cu lo afecta e perspectivanan economico, pero tin algun otro asuntonan adicional, incluyendo e posicion financiero debil di Gobierno, relata na dilemanan rond di e fondo di pensioen di empleadonan publico y e fondo di pensioen di behes, como tambe e gastonan relativamente halto di empleadonan publico y AZV, cual ta rekeri solucionan urgente y amplio. Solamente asina futuro lo mustra mucho mas alentador.
Incertidumbe rond di ciere di refeneria y turismo den decadencia tabata afecta negativamente nos desaroyo economico, finazas publico debil, asocia cu e dilema rond di e fondonan di Pensioen di APFA y SVb, gastonan halto di personal y di AZV. Pa loke ta e puntonan crucial di preocupacion na 2009 di Banco Central. Tur a wordo atende y practicamente resolve y mucho mas.
- Nos a habri e refineria bek na 2011 y cu un margen halto di probabilidad cu nos ta habri’e bek na 2016;
- Nos a saca turismo for di su decadencia: di 810.000 turista pa aña na 2009 pa 1.1 miyon pa aña, mas di 300.00 mas turista y cu un entrada pa kamber mucho mas halto;
- Nos a rescata e fondo di pensioen di nos empleadonan publico for di rand di bancarota cu un grado di cobertura alarmantemente bou di 60% pa riba 100% awe;
- Nos a rescata nos sistema di Pensioen di Behes di perdidanan gigantesco di 30, 40, 60 mil florin pa aña. Awe e fondo di pensioen di behes ta conta cu un surplus y cobertura 100% garantisando asina un pensioen di behes sigur pa tur nos pensionadonan;
- Nos a haci AZV di un carga practicamente impagabel mas pa presupuesto di pais Aruba un seguro cu pa un percentahe halto ta cubri su propio gastonan cu prima di AZV y aporte grandi di BAZV.
- Nos a saca nos economia for di un recession di -8.9% na 2009 pa un crecemento di +3.6 na 2016: Un recuperacion di 12.5%;
- Nos a reduci desempleo di 10.6% na 2010 pa 7.5% na 2015 ofreciendo asina mas di 1500 cupo di trabou na nos ciudadanonan
- Na 2009/2010 Aruba tabata tin un deficit di -9.5% cu a bay pa un deficit di -2% na 2016; un reduccion di 7%.
E dos Gabinetenan aki ta marca historia di no unicamente a logra saca Aruba for di e abismo social-ecomomico, pero tambe esun di finazas publico y salba tur e institutonan di seguronan di pensioen y di seguro medico. Pero mes importante ta e vision guia pa nos curason cu ta pone enfoke riba e hende:
- Esnan di mas vulnerabel y pober den nos comunidad a mira nan onderstand aumenta, bijstand y salarionan minimo suplementa cu reparatietoeslagen y schoolkinderentoeslagen.
- Centronan di ciudad, barionan, scolnan y infrastructura den pleno renobacion y edificionan historico den restauracion y areanan y parkenan publico nobo pa ofrece nos comunidad un miho calidad di bida den pleno ehecucion.
- Hunto nos a crea plataformanan di Dialogo Social den nos Pais cu a trece stabilidad y participacion husto.
Aruba ta canando padilanti tambe den mundo cu ehecucion di un vision pa un desaroyo berde, duradero y sostenibel, tanto ecologicamente como social-economicamente. Aruba tin respet y aprecio mundial danki na su vision y anhelo.
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...