Ta ora nos tur bay dilanti nos por papia di progreso na Aruba 

E desicionnan cu gobierno di AVP a tuma na fin di aña ta mehora forsa di compra cu mas o menos 10% pa mas cu 60% di famianan den nos comunidad. E desicion di aumenta entradanan minimo y e bahamento di prijs di coriente hunto ta percura pa esey. E desicionnan aki ta mustra un biaha mas con partido AVP ta wak desaroyo di nos hendenan. E ta subraya e forma cu AVP a scohe pa saca nos pais di e crisis y pone crece atrobe. E escohencianan aki ta mustra en especial cu e meta di un desaroyo balansa cu AVP a scohe pe, no ta djis palabranan bashi den un campaña politico. Al contrario. Nan ta mustra con AVP ta duna contenido na e meta di crece y bay dilanti, pero tur hunto!

CRISIS Y CRECE
AVP a bisa bez tras bez, cu e miho forma di sali di e crisis ta door di pone nos pais crece atrobe. No door di corta gasto den forma bruto tur caminda y den poco tempo. Sigur no den e crisis cu Aruba tabata aden. Nos a haya hopi critica pa e maneho di crece prome y reforma despues. A yama e maneho aki irrealistico. E realidad ta sinembargo cu riba tur aspecto di finansa, economia, labor y forsa di compra, nos ta hayando rason. E recuperasion di Aruba, sin niun ayudo di afo, ta mas lihe y mas fuerte cu otro paisnan den Reino. E recuperacion di Aruba ta mas amplio y su efectonan ta wordo sinti den henter nos comunidad. E crecemento economico di 5 aña consecutivo no ta wordo refleha den cifranan economico so. Den entrada di gobierno tambe e ta wordo midi, aunke poco poco. Pero mas cu tur, famianan na Aruba, a ripara e adelanto den nan forsa di compra. Anto no di awor so. Ta for di 2011 caba pueblo a sinti e efecto di e maneho pa mehora forsa di compra. Ora e reduccion di BBO no a duna e efecto desea, a usa placa di caha di gobierno pa pone placa directamente den cartera di casi 50 mil trahado na Aruba cu e "reparatietoeslag". Mescos a haci pa pensiondonan. 6 mil trahado di gobierno y enseñansa a wak nan salario bay dilanti cu 5000 florin pa aña. Nan a haya e indexering cu a kita for di 2001 y nan a haya e prima di fin di aña y comienso di aña. Pero no solamente den salario e forsa di compra di mas cu 60 mil hende a mehora. Door di baha prijs di awa dos aña pasa y di coriente pa didos biaha den tres aña, e cantidad di placa cu ta keda den cartera a mehora. Asina a percura pa e crecemento economico di nos pais, yega na tur hende! Pesey por bisa cu Aruba a bay dilanti. Pasobra no ta un grupito so a bay dilanti. Pero un majoria di pueblo a bay dilanti. E maneho a percura pa economia crece, pa mas hende haya trabou y pa e forsa di compra mehora. Esaki ta e maneho balansa cu AVP a scohe pe. Den e maneho aki e mehoracion di forsa di compra ta essencial. Sin esaki no lo por a papia di adelanto di Aruba. Pasobra ta ora nos tur bay dilanti, Aruba ta bay dilanti! Esey ta loke nos a percura pe!

Expresionnan haci den e articulo aki no necesariamente ta refleha opinion di ArenaPoliti.co