President di KNVB Michiel van Praag cu un delegacion a bishita Prome Minister Eman 
‘Mas bo practica, miho bo ta bira’ 

ORANJESTAD- President di KNVB, Vice President di UEFA y ex-CEO di AFC Ajax Michiel van Praag ta na Aruba pa tene varios encuentro cu stakeholdernan den futbol, manera ABV, Lifida y clubnan deportivo. Diabierna atardi e icono riba tereno futbolistico van Praag a bishita Prome Minister Mike Eman. El a wordo compaña pa sr. Richard Dijkhoff, presidente di ABV y miembronan di su delegacion, Bert van Oostveen; Jean Pierre Decossaux y Johan van Geijn.

Despues di e reunion sr. van Praag a splica cu nan a papia di nan bishita na ABV. Nan a kier ehecuta proyectonan hunto riba Aruba, pero tambe nan kier intensiva e relacion cu tin cu ABV. “Pa nos por traha den forma mas estrecho cu otro. Mi conoce Richard (President di ABV) hopi aña caba y e tambe ta haya esaki un bon idea. Nos a splica Prome Minister con nos ta mira futbol cu ta e mesun forma con ABV ta mira futbol.” Van Praag ta bisa cu esaki kier men pa laga mas hoben participa den wega di futbol, mas participacion den barionan, percura pa e hobennan di e bario por haci deporte y di e forma aki hisa e futbol di Aruba riba un nivel mas halto. “Mas bo practica, miho bo ta bira.”

Sr. van Praag a bisa cu durante e reunion di diasabra cu ABV nan ta bay mas den detaye riba e plannan y traha riba nan. “Nos a papia ampliamente cu Minister President di nos plannan y e ta sostene nan completamente y miho ainda, e kier yuda realisa nan. Mi tin un par di ora so riba e isla y ya caba Richard y ami ta masha positivo con cos ta bayendo. Nos tabatin un reunion cu Minister Schwengle di Deporte y e tambe ta riba e mesun liña cu ABV.” Van Praag a bisa cu nan di KNVB tin hopi gana di traha cu e islanan di Caribe y Surnam. El a bisa cu ABV a traha henter un programa pa nan mientras nan ta na Aruba y lo bishita club, bario, fundacion y otro organisacionnan. Asina nan mes por experiencia con cosnan ta bayendo na Aruba den e mundo di futbol.

Pa loke ta e veldnan chikito di yerba artificial van Praag a bisa cu el a compronde di Prome Minister cu Aruba tin mester di mas di e veldnan ey. E idea di bin cu mas veld ta oke, pero mester mas cu esey so. “Mester percura pa tin bon coach, bon mantencion di e veldnan, cu e hobennan cu ta bin pa hunga futbol ta wordo bon getraind. “Pa loke ta curso pa bira coach nos kier duna un man den esey. Si ta necesario pa nos hunga un rol den realisacion di e veldnan, nos lo haci esaki sigur tambe. Door di e netwerk cu nos tin nos por haya e veldnan aki podise na un prijs mas abou. Aki nos ta papia di iluminacion y mantencion. Tur esaki mester wordo palabra ainda cu ABV y di eynan mester sali un plan integral.”

Su dia siguiente den oranan di atardi sr. van Praag, su delegacion, ABV, Prome Minister Eman, BoBario, Director di FCCA van Poppel y demas ehecutivonan envolvi den deporte y e bario a bishita e veldnan di yerba artificial na Bushiri y Madiki Kavel. Habitantenan y e comision encarga cu e veldnan tabata presente y un cantidad di mucha a core yega cerca pa hunga un wega den e solo cu tabata briya. Tanto sr. van Praag como esnan cu a compañe a keda impresiona cu e veldnan meymey di e dos barionan aki. Tin mas di e veldnan aki na Aruba y e intencion ta pa mas wordo construi den e periodo nos dilanti.

Expresionnan haci den e articulo aki no necesariamente ta refleha opinion di ArenaPoliti.co