Minister Benny Sevinger no tin un maneho di infrastructura. Si nos wak kiko tur ta pasando na Aruba caminda practicamente tur caminda bo bira, den barionan residencial, den tur skina na Aruba supermercadonan ta lanta manera paddestoel, hardware stores ta lanta manera paddestoel y sin lubida restaurantnan nos por conclui cu e maneho ta mas bien dirigi den cambio di destinacion pa tereno an erfpacht.
Tin un Ley di Ordenanza Teritorial (aproba na 2007) y tambe Plan di Maneho Teritorial (ROP) finalisa na 2009. Esaki ta regula den ki area zona por bin un supermercado, un restaurant, un hotel etc. Ta pesey a trata e ley aki pa e situacion no sali for di man manera ta e caso awor. Si nos sigui declaracion di e abogado den e caso di e boutique hotel ocean-Z caminda e abogado a trece dilanti cu den e area di Malmok mes minister Sevinger a cambia un gran cantidad di destinacionan di tereno erfpacht y den e maneho actual 50% di peticionan di cambio di bestemming ta wordo otorga. Cuanto ta e casnan cu a wordo cumpra den zonanan residencial cu Benny Sevinger ta bai di acuerdo pa cambia e destinacion di e erfpacht y cambia esaki den sea supermercado, hardware store of restaurant. E pregunta cardinal ta, dikon e minister ta bai di acuerdo cu tur e cambionan di destinacionan? Dikon e no ta tene su mes na e plan di maneho territorial? Kendenan ta haya e trato preferencial aki?
Esaki ta bisa nos cu e minister ta actuando contra ley y ta actuando illegal pasobra tin un ley cu mester atene su mes na dje y e ta scohe pa no haci esaki. No ta paso bo ta un minister bo por haci y deshaci y cambia destinancionan pa loco manera ta sosodiendo e ultimo 6 anjanan aki. Actualmente Aruba ta conta cu un total di 173 supermercado, pa cada 200 famia tin un supermercado anto e ora nos mester puntra nos mes con por a yega asina lew cu e situacion awe na anja 2016 ta asina aki. Kiko esaki ta bisa nos di e actual minister Benny Sevinger. Un cos ta sigur, e minister ta haciendo fiesta no solamente cu otorgamento di tereno manera e caso di Roberto Rincon caminda den 2 dia di trabou Rincon ta haya su tereno pero e ta hacienda fiesta tambe cu cambio di destinacionan di tereno erfpacht. E no ta tene su mes na ley, no tin un maneho y no ta importe tampoco e desaroyo di e pais aki. Awendia famianan ta bai drumi anochi y ta lanta mainta haya supermercado, bar of restaurant pega na nan cura di cas. Ta di lamenta cu benny Sevinger a laga e pais aki bira asina aki. E ta un mahos bista pa nos turistanan cu den cada skina tin sea un supermercado of un bar. E ta mustra desorganiza y e impression cu ta wordo crea ta cu e pais aki no tin ley, no tin regla y mas bien e ta un free for all caminda tur hende por haci loke nan kier. Mihor bisa esnan cu yega serca benny Sevinger y dune peticionan ‘’hand delivered’’ ta haya e trato preferencial aki.
Mirando e desaroyo den e ministerio aki di infrastructura mester bin sea o encuesta parlamentario of un investogacion profundo riba Benny Sevinger pa determina kiko ta pasando den e maneho aki. Tin tur indicacion cu tin hopi cosnan robez ta pasando y e ta bisto cu no tin maneho.

Expresionnan haci den e articulo aki no necesariamente ta refleha opinion di ArenaPoliti.co