Evelyn Wever-Croes (MEP): Mike Eman ta abusa cu placa di pueblo: 114 coordinador
Gastonan di coordinador, 33 miyon florin.
ORANJESTAD -- Lider di MEP Evelyn Wever-Croes a cuestiona e abusonan cu ta tuma lugar den aparato di gobierno, y a enfoca e biaha aki riba e gastonan di coordinador.
"Mike Eman tin 114 coordinador rond di dje, siendo cu Nel Oduber tabata tin 17. Anto riba dje, Nel Oduber a goberna mucho mihor cu Mike Eman. Un otro cu ta abusa ta Benny Sievinger, cu tin 69 coordinador, siendo cu e minister di infrastructura di MEP tabata tin apenas 19 pa e cartera di ensenjansa y infrastructura. Asina si bo compara e ministernan di MEP cu esunnan di AVP, bo ta mira cu AVP tin 338 coordinador, compara cu 106 di MEP.
Mas tristo ta cu ningun hende por splica ainda dicon Mike Eman mester di 114 coordinador?
E gastonan total ta 32.5 miyon florin, cual ta un salario average di 8000 florin pa cada coordinador.
E abusonan aki ta dimas! No tin placa pa combati criminalidad, no tin placa pa un mihor cuido di salud, nan ta suta pueblo cu mas medida cu ta afecta poder di compra, pero pa nan biaha y fiesta si nan tin e placa", segun Lider di MEP.
SOLUCION DI MEP
Lider di MEP a bolbe enfatisa cu MEP ta kere cu prome ta e ministernan mester baha gasto y despues bo por pidi pueblo pa hala faha mara. E plan di MEP ta simple:
Stap 1: baha e cantidad di minister di 9 pa 7 minister, y bo ta scapa 17 miyon florin
Stap 2: baha e cantidad di coordinador y bo ta scapa 24 miyon florin
Stap 3: baha e gastonan di biahamento, huurmento, propaganda y abogado, y bo ta scapa 9 miyon florin
Asina den 3 stap sensiyo, bo ta scapa 50 miyon florin SIN cu bo mester bai na pueblo cu mas medida y bo por hasi hopi cu e 50 miyon aki, especialmente combati criminalidad y baha costo di bida.
Expresionnan haci den e articulo aki no necesariamente ta refleha opinion di ArenaPoliti.co