Den e presupuesto 2016, gobierno tin caba presupuesta e entradanan di un supuesto reapertura di e refineria, como entrada. Algo similar nan tambe a haci den pasado, no solamente cu e entradanan di e refineria, pero tambe cu e entradanan di un parke di molina di biento. Ni maske con creativo e gobierno aki por ta cu cifranan, na final di dia e presupuesto 2016 ta carece di seriedad, credibilidad y realismo. Asina mes, e presupuesto 2016 a wordo aproba diaranson madruga den pura, pa cumpli cu e extension pidi na Hulanda.

Analisando e cifra cu gobierno tin presupuesta como entrada di e refineria, anto e ta provoca solo un tipo di reaccion: En serio? Banda cu e refineria no lo drenta den operacion na 2016, e CITGO-entradanan mester ta e solucion pa e situacion deplorabel cu e gobierno actual a hinca Aruba aden? Ban ta serio, esaki ta djis pone hende hari mas y cuestiona e calidad di gobernacion. Siman pasa, un di e expertonan cu ta conseha gobierno den asuntonan petrolero, a declara: ‘CITGO lo lease e refineria pa 20 miyon dollar pa aña’. Manera gobierno no tin placa pa cumpra e refineria, e mes lo bay fia e placa aki cerca e mesun CITGO. Dus di e 20 miyon dollar aki di ‘entrada’, mester wordo kita e ‘aflossing plus interes’ di e prestamo ‘off-book’ (dus scondi pa parlamento y pueblo). By the way, e prestamo aki, tambe ta contra e palabracionnan haci cu Hulanda aña pasa. Tambe e prestamo aki, ta mina e funcion di control financiero di parlamento.  Banda di esaki, e prestamo aki lo aumenta e debe nacional mas y hinca pueblo mas den debe. Dus e ta bon pa pueblo haya sa precies ki deal ta wordo haci cu CITGO pa e prestamo aki, prome cu cumpra e refineria of cera cualkier otro deal.

E experto petrolero a sigui declara: ’CITGO lo mester paga belasting..ta trata di un belasting fiho di 10 miyon dollar pa aña. Ademas ora CITGO haci ganashi, e lo mester paga entre 6 cu 7% di belasting di ganashi’. Wel pa cuminsa cu e ultimo. E ta hopi facil pa un operador di refineria crea un entidad huridico, pa asina percura cu semper e refineria lo draai cu poco ganashi of cu un deficit. Asina e operador lo no tin cu paga ningun of poco impuesto riba ganashi. Tur operador den pasado, a haci uzo di e practica aki. Dus e ta hopi probabel cu CITGO tambe lo haci mescos. Dus hopi alivio e 6-7% di impuesto aki, lo no tin pa yuda cera e buraco financiero di mas di 6 biyon florin di debe cu Aruba tin.

Pa ilustra atrobe con gobierno kier bende pueblo un 6 pa un 9 cu e ‘CITGO-deal’, e experto petrolero a bisa: ’E refineria di Aruba ta converti su mes den un sorto di salbabida pa Venezuela’ (Solo, 29 januari 2016). Wel si Aruba lo ta e ‘salbabida pa Venezuela’, anto dicon Aruba lo haya solamente 10 miyon dollar (18 miyon florin) pa su acto di ‘salbabida’? E ‘salbabida’ no merece mas? Of e ‘recompensa di salbabida’ mester a wordo reparti prome bou di algun privilegiadonan, lagando Aruba cu solamente 18 miyon florin?

Un comparacion. Den tempo di Lago Oil, e compania mester a paga alrededor di 40 miyon florin na impuesto anual. Y corda cu na 1985, 40 miyon florin tabata hopi placa. Dus, ki luho e 18 miyon florin aki tin awendia? Gobierno kier bende pueblo cu e ‘CITGO-deal’ ta bon, ‘cueste lo que cueste’. Ki berguensa!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co