Gabinete ME II: Studiantenan di IPA a haya un presentacion interesante riba e tema di maneho y sostenibilidad di Gabinete Mike Eman II
![160217 presentacion sostenibilidad1](/images/2016-Q1/160217-presentacion-sostenibilidad1.jpg)
ORANJESTAD – Casi 50 studiante di Instituto Pedagogico Arubano durante un bishita na bestuurskantoor, a haya un presentacion riba e tema di sostenibilidad. E futuro docentenan a haya informacion amplio di loke Gabinete Mike Eman I y II a haci y ta haciendo riba e tereno aki cu lo percura pa un miho calidad di bida pa poblacion di Aruba.
E presentacion, cu a tuma luga den sala di presentacion di 'E Cocolishi' tabata na encargo di Lara Kuiperi, funcionario di Ministerio di Asuntonan General, kende a dividi e presentacion den e parti di loke Gobierno di Aruba a logra caba den e periodo di 2010 pa 2015 (Millenium Development Goals) y metanan cu ta traha riba dje den e periodo di 2016- 2030 (Sustainable Development Goals). E meta cu Gobierno kier logra na final ta un prosperidad sostenibil y comparti, cual ta metanan cu mundo ta trahando riba nan tambe.
Sostenibilidad no ta un tema of meta sin mas. E ta hopi mas cu esey, pasobra a lo largo e ta trece cu ne cuponan di trabou nobo y crecemento economico. Ehempel di esaki, Prome Minister Mike Eman a splica e hobennan ta e cooperacion cu Aruba ta logrando cu Hulanda, mirando e ubicacion strategico di Aruba. No ta pornada Rietveld Academie a bini Aruba. E academia aki tin un nomber grandi y estableciendo su mes na Aruba, nan por ricibi studiantenan for di region. Otro ehempel ta TNO, 'Toegepast Natuurwetenschappelijk Onderzoek', cu tin e lema “Nos ta conecta hende y conocemento pa crea inovacion”. Ya caba por mira resultadonan di e establecimento na Aruba, cu a cera diferente acuerdo di cooperacion caba cu paisnan den bisindario. A base di establecimento di TNO na Aruba, casi 15 hoben profesional den ramo di ingenieria ta emplea na e instituto importante aki, Prome Minister Eman a splica.
![160217 presentacion sostenibilidad2](/images/2016-Q1/160217-presentacion-sostenibilidad2.jpg)
E ubicacion di Aruba ta masha importante pa e exportacion di conocemento. Aruba su hendenan conoce e idioma y cultura di paisnan den bisindario y por negocia di un miho forma na nomber di p.e. TNO, cu di e forma aki ta exporta nan conocemento pa e area di Caribe y Latino America despues di a crea un nomber caba na Hulanda y Europa.
Den e presentacion tanto Prome Minister Mike Eman como Lara Kuiperi a duna ehempel di cada un di e metanan sostenibel a pone pa cumpli cu ne y a intercambia di pensamento cu e studiantenan con nan mes ta mira cada un di e puntonan aki of kico nan ta kere e lo por nifica na final di e caminda.
Aruba a cuminsa cana e caminda y ta haya reconocemento internacional. Prueba di esaki ta e cooperacion estrecho entre Nacionnan Uni y su diferente organisacionnan cu Aruba pa establecimento di un Centro di Conocemento na Aruba riba tereno di sostenibilidad. Pero tambe diferente invitacion cu e mandatario a ricibi pa duna discurso di e “road map” cu Aruba a traha riba tereno di sostenibilidad.
Pa e studiantenan di e di tres aña di Instituto Pedagogico Arubano, e merdia tabata uno sumamente informativo.
![160217 presentacion sostenibilidad3](/images/2016-Q1/160217-presentacion-sostenibilidad3.jpg)
Expresionnan haci den e articulo aki no necesariamente ta refleha opinion di ArenaPoliti.co