Negociacionnan pa e 'Definitive Participation Agreement' den etapa cumbre. 

ORANJESTAD – Minister di Asuntonan Economico y Energia, ing. Mike de Meza, hunto cu su colega Minister drs. Paul Croes encarga cu Labor, a lidera un delegacion di expertonan legal, financiero, tecnico y fiscal na Houston pa sigui cu e negociacionnan pa futuro rehabilitacion y reapertura di e refineria. Diabierna ultimo nan a regresa sumamente satisfecho despues di un siman fructifero. “Negociacionnan pa e 'Definitive Participation Agreement' entre Aruba cu Citgo ta den un etapa cumbre,” Minister Mike de Meza a declara. “E dianan cu ta tras di lomba a logra avansa riba temanan sumamente importante pa ambos partido.” 

Despues di a inicia e fase final di negociacionnan pa un 'Definitive Participation Agreement' na comienso di luna di januari, varios sesion di negociacion a tuma luga entre e ekiponan di Gobierno di Aruba y di CITGO na Aruba como na Houston. Durante su estadia na Houston, Minister de Meza a reuni cu dr. Nelson Martinez, Presidente y CEO di CITGO. Ademas di e mandatarionan, e delegacion di Aruba a consisti di e ekipo di negociacion asisti pa expertonan riba tereno di refineria y operacion, como tambe pa expertonan legal y fiscal. “Hunto cu ambos delegacion di negociacion nos a fiha e plan di accion pa e ultimo simannan nos dilanti prome cu 31 di maart,” segun e titular di Energia. “E siman aki e ekiponan negociado lo conveni atrobe na Aruba.”

“Rehabilitacion di un pilar economico historico ta mas cerca,” asina Minister Mike de Meza a informa na su yegada for di Houston. Despues di a yega na acuerdonan di principio riba temanan importante entre Gobierno di Aruba e refineria, ta negociando den mas detaye e modelo di negoshi, como tambe aspectonan di medio ambiente, laboral, fiscal y uzo tecnologianan limpi. “E fase di negociacion aki ta uno intenso y compleho entre Gobierno di Aruba y CITGO,” Minister de Meza a indica.

For di aña pasa diferente mision nan tecnico, economico y legal a bishita Aruba. Nan a haci nan investigacionnan di e facilidadnan di e refineria, studia nos sistema legal, como tambe haci nan analisis comercial. E fase nobo aki ta aki ta un resultado concreto di e empeñonan cu Gobierno di Aruba ta hibando for di algun aña. Minister de Meza, aunke cauteloso, a expresa su mes na un forma positivo riba e desaroyonan. De Meza a subraya cu e periodo nos dilanti lo ta uno crucial. Sinembargo e ta sumamente contento cu e paso aki y ta spera cu e trabounan nos dilanti ta conclui di un manera satisfactorio pa pueblo di Aruba, en particular e parti pariba di nos isla.

Di acuerdo cu e 'Memorandum of Understanding' (MoU) firma dia 22 di september 2015 ultimo, Citgo a indica na Gobierno di Aruba prome cu 30 di november di lo inicia e negociacionnan pa reapertura di e refineria na Aruba. Segun e MoU e siguiente fase di negociacion a resulta den un 'Heads of Agreement', of acuerdo marco, cu a wordo firma dia 23 di december ultimo. Januari ultimo, Minister de Meza hunto cu President y CEO di Citgo a haci e “kick off” pa inicia e negociacionnan di e “Definitive Participation Agreement” entre Gobierno di Aruba y CITGO.

Expresionnan haci den e articulo aki no necesariamente ta refleha opinion di ArenaPoliti.co