Un hilaridad nobo di MEP ta cu nan kier prohibi un minister di contesta nan preguntanan den sala di Parlamento. Esey a sosode ora Minister Otmar Oduber a bin parlamento pa contesta preguntanan tocante di e destaho pa usa e derechonan di e logo di promosion di Aruba. Fraccion di AVP a entrega cinco pregunta al caso pa e minister bin contesta. E fraccion di MEP a haci 20 pregunta yena cu insinuacion y cu peticion pa duna informacion confidencial. Segun reglamento di orden di Parlamento e minister mester contesta e preguntanan cu a haci na dje pa e reunion. E preguntanan cu MEP a haci tabata pa e minister contesta riba papel. Pero ya cu e minister tabata den parlamento ela ofrece pa contesta tur e preguntanan di MEP tambe. Esey lo a sirbi transparencia publico, pasobra e reunion tabata wordo transmiti via television pa tur hende por wak y tende. Esey a wordo aplaudi door di AVP. Sinembargo e dos miembronan di e fraccion di MEP cu tabata den e reunion a protesta contra di esaki y no tabata kier pa e minister contesta nan preguntanan pa henter pueblo mes por a wak y scuchames ora. E dos miembronan di MEP a insisti pa e minister manda su contestanan scirbi. Minister a bisa di lo contesta nan a corto plazo. Pero tur hende a keda straña cu esnan cu a haci pregunta, no tabata kier pa e minister contesta e preguntanan na momento cu henter pueblo ta wak. MEP kier haya e contestanan scirbi pa nan sigui haci tur sorto di insinuacion y acusacion cu palabranan di e minister. Obviamente no ta e berdad ta loke MEP kier, pero djis cosnan pa haci wega sushi cun'e. Esey ta e nivel di MEP awe!

Expresionnan haci den e articulo aki no necesariamente ta refleha opinion di ArenaPoliti.co