Binticinco aña despues di e prome ‘Summit of Americas’, ex Presidente  di  Merca  Bill Clinton ta invitando lidernan di gobiernonan, di comercio, filantropia, sociedad civil y universidadnan pa bin hunto pa hiba combersacion riba e siguiente binti añanan y nos ‘shared future” den un evento di nivel halto yama “The Future of the Americas.”

Lidernan cu Prome Minister Eman lo topa na e top aki ta inclui: President di Colombia Juan Manuel Santos, Gobernador di Puerto Rico Alejandro Garcia Padilla y  Presidente  di e Inter-American Development Bank Luis Alberto Moreno.

Segun President Clinton, Latino-America y e region Caribense  ta creciendo den forma rapido durante e siguiente 20 añanan y ta na nos pa duna forma na e crecemento aki pa sigura cu prosperidad  ta inclui den e crecemento aki  y cu mas tanto miembronan di famianan den e paisnan aki tin acceso na educacion, empleo, cuido medico, energia confiabel y duradero y otro necesidadnan cu ta vital. Clinton a agrega “Nos mester percura pa oportunidad ta alcansa tur hende”. 

E evento prestigioso aki ta wordo teni na University of Miami y lo duna e varios lidernan oportunidad pa participa na serienan di discusionnan di mesa rondo cu tin como topico energia/infrastructura/medio ambiente, agricultura, nutricion, malesanan cronico, educacion primaria, trainingnan vocacional, Small-Medium Enterprises, reinforsamento di  e hende muhe  den sociedad y IT connectivity.

Prome Minister Eman tin e tarea pa comparti su pensamentonan specificamente riba e topico energia/infrastructura y medio ambiente – tur ta areanan na unda Auba a haci progresonan dramatico y ta wordo recococe como un lider den e region. Pa e vision pa conecta desaroyo economico na  prosperidad sostenibel  Aruba y Prome Minister Mike Eman ta hayando masha hopi aprecio, elogio y sosten di organisacionnan mundialmente reconoci manera  UN, UNDP, UNIDO, the World Bank y NGO’s internacional manera  Carbon War Room di  Sir  Richard Branson, US braintrust den tecnologia Rocky Mountain Institute, Harvard University, Colombia University, TU Delft di Hulanda y e instituto di estudio di ciencia aplicabel mas grandi na Hulanda, TNO.  

Den luz di e platafoma nobo pa cual Eman ta invita el a bisa lo siguiente “Mi ta sinti mi mes honra di ta un invitado di President Clinton pa comparti experiencianan y vision di Aruba pa loke ta properidad sostenibel cu nos coleganan den region. Mi ta comparti su pensamento pa haci nos famianan mas fuerte y ofrece opotunidad na tur hende. President Clinton su vision ta hopi similar na e vision di Aruba pa sigura cu bienestar economico ta bay man den man cu bienestar social. Mi ta tambe ansioso pa tende di e idea y preocupacionnan di e otronan pa loke ta futuro di nos region.” Tur e lidernan lo join otro den e palabranan di President Clinton : ‘Pa pensa riba formanan con nan por haci mas pa profundisa nos relacionnan y crea mas crecemento equitativo” y “pa haci e siguiente 20 añanan miho ainda cu ultimo 20 añanan”.

Expresionnan haci den e articulo aki no necesariamente ta refleha opinion di ArenaPoliti.co