Mientras cu Gobierno si ta contesta

Diahuebs ultimo, como parti di un serie di reunionnan riba e tema di e proposicion di ley pa regulacion di All-inclusive, e mandatario di turismo a sinta cu AHATA pa dialoga. Gobierno ta sugeri pa e organisacion cu ta representa hotelnan na Aruba trece dilanti e punto specifico cu ta preta na nan sapato. A keda palabra cu tur partido lo bolbe sinta na mesa dialuna, sinembargo dialuna mainta AHATA a pidi pa cancela esaki.
Den fin di siman AHATA a ricibi un carta di Gobierno unda ta mustra cu pa varios aña Ministerio di Turismo ta traha di cerca cu e Departamento di Economia, Comercio y Industria, di cual riba un base regular ta duna conseho riba otorgamento di permiso pa negoshinan liga na turismo. Tambe ta asina cu tin specificacion riba cua ta keda considera pa permisonan na momento di duna conseho. A haci mencion tambe durante e ultimo reunion cu desde inicio di e aña aki (2016), Ministerio di Turismo ta traha di cerca cu Ministerio di Infrastructura y Integracion na momento di otorga permiso pa tereno y construccion di hotelnan, condominiums y apartamentonan na Aruba. Gobierno ta mustra cu e criterionan den e casonan menciona ta core paralelo cu henter e spirito di e ley cu dentro di poco lo mester wordo trata den Parlamento. AHATA na su turno awor kier presenta un alternativa na e proposicion di ley, unda cu Sr. Oduber a pidi pa pone esaki den un carta. Segun e documento presenta diahuebs den e reunion, ta propone introduccion di "regulacion" por medio di un Ordenansa di Negoshi pa cual e Minister di Turismo lo tin autoridad pa dicidi riba peticionnan segun e Ordenansa. Durante e reunion di diahuebs Gobierno a mustra caba riba e hecho cu e proposicion aki ta mustra un forma con pa regula na luga di mustra kico pa regula. Un biaha mas no ta contesta e peticion di e mandatario pa trece un proposicion dilanti cu lo por contribui na e ley cu tin riba mesa, pa haciele uno miho. Banda di esaki e proposicion ta inclui un cambio den autoridad cual ta un poco complica den perspectiva Gubernamental. Por bisa acerca cu un alternativa asina aki lo cubri solamente e operadornan di All-inclusive nobo y no esnan existente. Gobierno a señala na mas cu un ocasion cu pa e proposicion di ley ta uno efectivo e mester ta aplicabel pa tur operador di hotel.
Lamentablemente e documento presenta na Gobierno ainda no ta trata e contenido specifico di e proposicion di ley. Un biaha mas Gobierno ta pidi AHATA pa defini exactamente con lo por modifica e proposicion di ley pa asina nan por yega mas cerca di un consenso cu lo por ta posibel. Modificacion lo por wordo trata cu tur seriedad con tal e tin e interes general di Aruba como prioridad y unico bienestar.
A indica den e carta tambe cu como e prome punto riba e agenda di e reunion di dialuna lo inicia cu lo introduci e proposicion di ley. Y cu experticio y experiencia di tur presente lo por modifica e proposicion pa yega na e miho bienestar y interes general di Pais Aruba.
Minister Oduber ta lamenta cu despues di e carta aki AHATA a dicidi di cancela e reunion di dialuna y awor ta pendiente pa continua cu e dialogo. 

Expresionnan haci den e articulo aki no necesariamente ta refleha opinion di ArenaPoliti.co