Nos pais ta den problema serio na momento cu turismo ta den problema. Hoteleronan ta preocupa, AHATA ta preocupa, Banco Central ta preocupa y ainda minister Otmar Oduber no kier admiti y reconoce cu e la fracasa y ta e cifranan ta demostra esaki, no ta ami ta bisa esaki. Nos ta trece e informacion aki dilanti pasobra e situacion aki ta preocupa nos enormemente. Nos tur por corda e celebracion grandi cu tawata tin na final di anja 2014 cu Aruba a yega e di 1.000.000 turista. Loke Otmar Oduber no a splica pueblo e tempo ey ta con e la yega e milestone aki. E crecemento ey tawata uno ficticio pasobra tawata danki na e crecemento inusual di turismo for di Venezuela, debi na e situacion di e pais, a logra surpasa mas cu 1.000.000 turista na anja 2014. Ningun momento Otmar Oduber a reconoce e tendencia aki y mas bien tawata bisa cu tur e turistnan cu ta bin for di Venezuela ta gasta placa pasobra nan ta keda na un apartamento, nan ta cumpra un pastechi y ta cumpra un coca cola tur dia. E realidad ta cu nunca bo por a usa e cifranan akin a bo fabor pasobra bo ta ganja bo mes cu un crecemento den turismo cu no tawata real.

Na e momentonan aki te hasta e turistanan stayover a cuminsa cai. Den luna di mei 2016 tawata tin un caida den e cantidad di bishitantenan cu ta bin Aruba. Kiko ATA ta bisa awe, awe e ta bisa cu e caida ta culpa di e ‘’raspa cuponan’’ cu no ta biniendo Aruba mas. Tempo nos fraccion tawata bisa cu e crecemento di turistnan Venezolano tawata uno ficticio pasobra e turistnan aki ta divisas nan tawata bin saca for di nos pais y raspa carchi ATA y Otmar Oduber tatwata nenga categoricamente y tawata broma cada vez con hopi nos turismo a crece den anjanan 2014 y 2015. Pa haci un comparacion pa e pueblo sa kiko e efecto tawata riba nos tursimo nos ta duna a e datosnan aki. Na anja 2013 por ehempel 150.000 Venezolano a bin nos pais. Diripiente den anjanan 2014 y 2015 esaki a conoce un aumento di mas cu 200.000 turista y e yega na 350.000 turista Venezolano. Ningun pais den Caribe tawata tin un crecemento asina aki. Nos a bisa esaki pero Otmar Oduber a keda ignora e tendencia aki y awe e mesun strategia cu e la usa pa e demostra crecemento den turismo a ‘’back fire’’ riba dje. Awe nan ta culpa e ‘’raspa cupos’’ nan pa e caida den turismo siendo cu si nan tawata sincero desde un principio por a anticipa di 2 anja pasa caba loke ta pasando awe. Pa 2 anja a keda broma cu crecemento ficticio, nan a keda sin tuma accion y awe e realidad ta otro! Loke Otmar Oduber ta haciendo ta hypocrita.

Ora turismo tawata crece danki na e "raspa cuponan" si Otmar Oduber y ATA no a yama nan asina y tawata bisa cuanto placa nan ta laga atras. Awor cu na luna di mei 2016 turismo ta cai, ta culpa di e raspa cuponan. Kiermen ora turismo ta subi no ta raspa cupo pero ora turismo cai ta nan culpa! Nos tin cu sinja papia e berdad y stop di manipula!

Expresionnan haci den e articulo aki no necesariamente ta refleha opinion di ArenaPoliti.co