Minister Otmar Oduber den Parlamento. 

Diabierna ultimo Parlamento a cuminsa trata e ley di “all inclusive” cu cual mester regula e cantidad di cambernan di e tipo aki, pa no crea un situacion cu no ta na interes di economia di nos pais.
Turismo a converti su mes den ultimo añanan, como e pilar di ecomomia di Aruba y su transformacion y progreso bou di maneho di Minister Otmar Oduber, sin duda a contribui pa Aruba den tempo di crisis rond mundo y mal maneho di Gobierno di MEP, por a mantene su mes den un posicion sumamente positivo.
Un desaroyo turistico-economico cu a haya reconocimento di instancianan financiero internacional manera Standard & Poors, IMF y Fitch Ratings, mescos cu Banco Central di Aruba y otro instancianan cu a reconoce esaki, incluso AHATA.
Durante tratamento di e ley aki, tabata bisto cu fraccionnan di oposicion tabata cambia di opinion constantemente riba e tema di all inclusive cu a pone cu Minister di Turismo, sr Otmar Oduber, a cataloga e politiconan aki como “camaleon” cu ta cambia di colo constantemente depende di e situacion.
“For di mainta cu tratamento di e ley di all inclusive a cuminsa, mi a tuma nota cu hopi politico a bin pa haci politica ya cu for di tres ora cu nos ta den e sala aki pa trata e ley, mi a ricibi un total di 17 pregunta riba e asunto aki, di cual cinco ta pregunta cu a wordo ripiti na varios ocasion caba, pues ta solamente 12 pregunta a ser haci na mi persona.
Pa algun politico di oposicion, tur cos ta depende di e situacion politico cu nan ta enfrentando ya aki den sala nan tin un colo, nan tin un bos, nan tin un caracter pero ora cu nan ta pafo y mester splica na pueblo kico ta pasando, pa e hendenan aki ta nan interes politico ta pisa mas cu realidad di e ley cu nos ta tratando den Parlamento na e momentonan aki.
E ley cu nos ta tratando awe no ta bay no ta bay riba diferente asunto cu a ser treci dilanti of con desaroyo turistico ta bayendo, pero e ley cu nos ta trata awe no ta pa discuti kende ta na fabor of no di all inclusive, si turismo mester di ley asina aki of no, pero e ley di awe ta pa pone e futuro di e pais aki, di nos cu ta biba, di nos yiunan cu tin cu sigui biba, di nos nietonan cu tin cu sigui biba riba e pida baranca aki, pa nan tin un miho porvenir cu nos tabatin na e momentonan aki.
Mi no a tende e discusion ey, pero mi a scucha un novela cu nos por duna e nomber di camaleon, ya cu nan ta blo cambia di colo, y nan ta blo cambia di postura.
Mi ta corda por ehempel mi tocayo cu mesun fam cumi, caminda e ta para dilanti di Hilton Hotel, acusando Otmar Oduber cu atrobe a bin un all inclusive, cu e cos aki ta malo pa Aruba, cu e cos aki ta desastroso pa Aruba, cu e cos aki ta bay caba cu turiusmo di Aruba.
Nos no ta caba cu all inclusive, nos no ta contra all inclusive, y mi a scucha nan papia di rapport di Banco Central cu lo ta bisa cu all inclusive ta bon pa Aruba, cu Banco Central no a bisa cu e ta malo, pero esey no ta discusion den e reunion aki.
Nos kier regula all inclusive, nos si ta brasa e all inclusivenan cu tin na Aruba y nos ta bisa cu nos ta bay traha na un miho forma cu nan.
Awe nos por mira cu atrobe e camaleon ta cambia di colo, atrobe tin un otro opinion riba all inclusive, ya cu nos ta dilanti di eleccion y tin buki di bingo y rifa pa bende y nan a bay na tur e hotelnan grandi aki pa bende e bingo y rifanan aki pero ora cu nos mira e posicion awe, y awe ta bon pa nos mustra cu e camaleonnan aki ta prefera di para banda di esunnan cu no ta para pa interes di nos pais, cu no ta para pa interes di nos trahadonan cu semper a traha pa hiba nos turismo dilanti.
Awe mi no ta tende ningun di e dos fraccionnan di oposicion, ni di MEP y ni di PDR papia riba e taxistanan, mi no a tendenan papia riba e coki- y waiternan y tampoco riba trahadonan cu ta traha den mas di 300 restaurant cu tin, tampoco nan a papia riba e pober guy cu for di mainta tempran 6’or y mey te anochi 9’or ora cu e caba di laba su boto cu el a pasa 14 ora na lama den solo ta bende poco waverunner, bende poco watersport, mi no a tende ningun miembro di oposicion papia di nan.
Mi ta puntra mi mes si nan a yega di papia cu nan ooit prome cu awe, mi no a tende nan papia di e pobernan cu ta habri nan kiosco pa bende nan souvenir, mi no a tende papia di tur esunnan cu ta traha den tiendanan cu ta depende riba e turismo.
Mi no a tende papia ni di e personanan cu ta traha den un banco cu ta depende riba con turismo ta bayendo na Aruba, ya cu turismo ta 90% di nos economia, mi a tende ningun di nan papia riba e hendenan aki.
Pero awe nos a scucha bon cla di kende nan a papia, ya cu nan a papia di AHATA, di hotelnan, di doño di hotelnan, y a mustra bon cla cu ta nan interes nan kier nos cuida,” Minister Otmar Oduber a cuestiona e posicion di fraccion di MEP y PDR durante tratamento di e ley di all inclusive.

Expresionnan haci den e articulo aki no necesariamente ta refleha opinion di ArenaPoliti.co