Varios di nos ta crusa e brug na Pos Chiquito diariamente. Pero ken sa con sigur e brug aki ta?
Nos sa cu tin un compania desaroyador ta trahando riba e construccion di e proyecto aki, pero no ta logico cu nan mes ta esnan cu ta controla e trabou tambe.

Algun tempo atras un funcionario di DOW a bisa publicamente cu actualmente na Aruba no tin hende cualifica pa hasi e trabou di control pa tipo di construccion manera esun di e brug nobo na Pos Chiquito.
Teniendo esaki na cuenta, ta mi obligacion como representante di pueblo pa puntra Minister Sevinger algun pregunta di sumo importancia pa cu e proyecto aki.
Pasobra no por ta asina cu ta desaroyando proyectonan di gran embergadura, sin ningun tipo di control di calidad.

Pa ta mas specifico, e controlnan cu mi ta referi na dje ta controlnan tanto civil como tambe structural. Aki nos tin cu tene na cuenta e factornan ambiental, economico y principalmente di seguridad.
Ken por sigura nos cu e brug aki ta construi cu materialnan di calidad y duradero? Si no tin experto na Aruba pa hasi control di calidad riba e proyecto di e brug nobo na Pos Chiquito, ta con nos por sa cu e calidad di material uza ta esun corecto?
E brug aki lo bay keda den uzo constante door di nos hendenan y como tal Gobierno ta den e obligacion pa sigura e integridad fisico di tur di nos cu lo bay hasi uzo di dje.

Construccion di e Green Corridor ta lagando hopi duda atras y e Minister encarga no ta clarificando esakinan. No solamente nos como pueblo cu lo hasi uzo di e brug aki tin duda, pero te hasta esnan trahando tin duda rib e calidad di material uza den e proyecto aki.
E lo ta na su lugar pa Minister Sevinger duna DOW e opdracht pa nan trese expertonan di afo pa asina por sigura un control di calidad pa loke ta e proyecto di Green Corridor den su totalidad.

Expresionnan haci den e articulo aki no necesariamente ta refleha opinion di ArenaPoliti.co