Departamento di Integracion, Maneho y Admision di Stranhero (DIMAS) y Directie Arbeid en Onderzoek (DAO) a haya bishita di Ministernan Benny Sevinger y Paul Croes dialuna 5 di januari mainta tempran. E edificio, unda antes tabata sede di Oficina di Belasting, a wordo renoba totalmente transformando e den un edificio moderno, amplio y adecua pa servicio na clientenan di e dos departamentonan importante aki pa Pais Aruba.

Minister di Desaroyo teritorial, Infrastructura y Integracion Sr. Benny Sevinger a splica cu "tabata tin hopi discusion cua departamento ta bay ubica den e edificio aki. Tabata tin hopi departamentonan cu kier a haya e edificio aki y ainda tin di nan cu kier e edificio." E Minister encarga cu Integracion a splica cu e no tabata un proceso facil. A haci hopi investigacion pa determina cua departamentonan ta bay uza e edificio, pero tambe a haci hopi investigacion pa determina e viabilidad pa renoba e edificio.

"Tabata tin hopi investigacion cu a wordo haci riba e riba e skelet di e edificio, e structura di e hero, e vloernan. Den e proceso ey tabata tin un candela, cu a haci cu nos mester a yama expertonan di Hulanda bolbe haci investigacionnan riba e beton pa tur cos ta bon," Minister Sevinger a splica. Una bes cu a duna luz berde pa cuminsa, construccion a cuminsa na 2013 y a tuma un poco mas di 1 aña pa termina. Mei Mei di 2014 e construccionnan a keda termina y DAO y DIMAS a cuminsa prepara pa drenta e edificio.

Construccion riba un edificio existente ta trece e posibilidad cu cosnan no por premira por sosode. No ta tur ora por tene cuenta cu tur cos. Pa e motibo aki mes, Sr. Sevinger ta splica cu "den tur proyecto tin loke nos ta yama un onderhoudsfase, cu por lo menos e ta 3 luna tin biaha 6 luna, cu e contratista mester keda mantene cosnan cu por bay fout inicialmente, e mester keda vigila kico a bay malo y den e caso aki, nos u'no por bisa nada otro cu den e edificio aki, esey ta e caso." Una bes cu DAO y DIMAS a drenta e edificio a constata cu tabata tin problemanan cu no a premira y a haci e ahustenan necesario pa remedia esaki.

Minister Sevinger: "Expertonan a haci mas o menos 70 test riba e edificio: calidad di aire, calidad di e structura, di sistema di awa etc." Di e 70 testnan cu a haci, na final tur a sali bon y asina a duna OK pa e edificio a keda declara adecua pa uzo di e servicionan publico.

E ministernan a haya un recorido di e edificio totalmente renoba y a haya un bon feedback di e empleadonan cu ta contento di por cuminsa aña 2015 den un edificio bunita, moderno y amplio, pa asina por duna e miho servicio posibel na nan clientenan.

Tanto Minister Sevinger como Croes a keda satisfecho di loke nan por a mira durante e recorido.

Expresionnan haci den e articulo aki no necesariamente ta refleha opinion di ArenaPoliti.co