Mayan 5 september 2016 minister Benny Sevinger mester bin parlamento di Aruba pa duna cuenta. E mester bin responsabiliza su mes cpon fiesta cu patrimonio di pueblo a tuma lugar e ultimo anjanan aki, bao su conocimento y cu su cooperacion. E netwerk di Benny Sevinger ta consisti di su chief of staff, su secretaria, sobrinonan di esnan cu ta bende tereno, un tal Franklin cu ta labora na DIP, un tal Lourens cu ta traha di serca cu Benny. E netwerk aki e haci posibel pa entrega terenonan commercial na diferente grupo y famia pa esakinan wordo poni na benta.

Mayan ta un dia hopi importante pa e pueblo por wordo informa con corrupcion a wordo haci legal cu terenonan di pueblo. Un cantidad di prueba lo wordo presenta y pueblo mes lo mester huzga Benny. Nos ta convenci cu den fraccion di AVP no tin ningun hende cu curashi pa manda Benny Sevinger cas pero esey e pueblo mes lo take care di dje otro anja. Hecho ta si cu un minister asina NO por keda. Su integridad ta na suela, su credibilidad ta na suela y tur e casonan den corte ta pisa hopi. No solamente e casonan den corte sino tambe e hecho cu e como minister tawata willens en wetens na altura di tur loke ta pasando. Tin varios stroman a wordo usa den e structura di bendemento di tereno. Tin email di secretaria di Benny Sevinger ta wordo manda pa stroman. Tin email nan cu ta prueba con terenonan ta wordo reserva pa hende. Cual ciudadano por haya e trato aki? Cual ciudadano por scohe na unda e kier traha un cas?

Benny Sevinger no a campanja cu esaki. Ora Benny a drenta boso cas eleccion pasa e no a bisa cu e ta bai bende Aruba na e manera aki. E no a bisa cu su oficina ta bira un oficina ta bira un compania di Real Estate. Benny Sevinger a lubida di unda e ta bin, e la lubida e pueblo votador y ta ofrece yudanza solamente na esnan cu tin manera pa paga. Tin asina tanto prueba contra Benny Sevinger cu hamas y nunca e por keda despues di mayan como minister.

Si Benny Sevinger mes tin un tiki di cuero di cara ainda e mes como minister responsabel pa e disaster cu e le crea mester asumi su responsabilidad y entrega su retiro. Benny a usa e pueblo votador pa yega na poder y pa despues bandona e lucha y yuda amigonan, coordinadornan y sponsornan.

Nos ta haci un invitacion na henter e pueblo di Aruba pa NO perde e reunion aki caminda un prueba tras di otro lo wordo presenta y tur documento lo wordo poni ter inzage pa fraccion di AVP mes pasa door di nan. Benny Sevinger nunca por bai bisa mayan cu e no sa di bendemento di tereno y e fiesta cu ta tumando lugar pasobra su propio secretaria ta den e loop di emailsnan. Minister ta lubida cu ta su propio hendenan cu a fada di abuso ta parti e documentonan aki rond pasobra nan mes no kier sigui tolera tanto bagamunderia!  

Expresionnan haci den e articulo aki no necesariamente ta refleha opinion di ArenaPoliti.co