MEP: Diariamente Mike Eman ta sigui venena mente di pueblo cu su mentiranan contra MEP (parti 1)
Siman pasa Prome Minister Mike Eman tabata di remate cu su mentiranan contra MEP y ta bisto cu esaki ya ta birando algo normal pa su persona. Cada biaha cu Mike Eman bay bishita un bario, sea pa pone klinkers dilanti e casnan social, verf casnan inhabita, chapi yerba of subi riba truck di Elmar pa pone luz di caya, su persona ta lansa su mentiranan bisando e habitantenan cu ta su gobierno durante e ultimo 7 añanan a percura pa aumenta salario minimo, aumenta pensioen di viehez, reduci prijs di awa y coriente y reduci prijs di gasolin na Aruba. Y naturalmente e no por laga di tira su skopnan contra MEP alegando cu nos partido no a haci net nada pa e pueblo aki. Pero Mike Eman ta lubida cu si no ta pa MEP cu a construi tur e casnan social den tur bario di Aruba, awe e no por ta cana pronkia y pega su klinkernan dilanti e casnan aki. Ta pesey un biaha mas MEP ta haya su mes obliga di refuta tur e mentiranan di Mike Eman.
Prijs di awa y coriente
Na momento cu Gabinete Oduber a bandona gobernacion na October 2009 e tarifa di coriente tabata Af. 299.51 y na Augustus 2016 esaki a yega na Af. 308.76. Pues un aumento di 3% den 7 aña di Gabinete Eman. Pa loke ta e tarifa di awa esaki a ser reduci cu 12% y no cu 30% manera Mike Eman ta gaña e pueblo tur dia. Sinembargo mester trece padilanti cu e reduccion aki ta basa completamente riba introduccion di e plantanan di Seawater Reverse Osmosis y RECIP cu a inicia durante Gabinete Oduber IV. Esaki ta wordo confirma tambe door di director di WEB kende na juli 2012 a declara den un comunicado di prensa “cu tur e inversionnan aki a inicia for di 2007 en adelante y cu porfin pueblo lo por bay disfruta di un rebaho substancial di e prijsnan di awa y coriente”. Cu esaki tambe e director di WEB a duna reconocimento publico na e vision di Gabinete Oduber.
Pa loke ta e aumento di tarifa di coriente esaki ta atribui completamente na e maneho iresponsabel di Gabinete Eman cu a hedge e prijs di crudo pa casi 100% durante un periodo di 2 aña. Esaki tabata un decision insolito y iresponsabel, ya cu esaki a conduci na un aumento drastico di e prijs di coriente desde oktober 2014. Te ainda pueblo no ta disfrutando y lo no disfruta por lo pronto di un prijs di coriente reduci debi na e decision descabeya aki di e gobernantenan actual.
Prijs di gasolin y diesel
Pa loke ta e desaroyo den e prijs di gasolin y diesel, MEP kier a mustra aki tambe con iresponsabel e gobierno di AVP ta manehando e pais aki. Aki tambe un comparacion ta ser haci entre Gabinete Oduber y Gabinete Eman. Si na October 2009 e prijs di crudo pa bari tabata 74.78 dollar, na augustus 2016 esaki a reduci te na aproximadamente 45 dollar pa bari. Pues un reduccion drastico di 40%. Sinembargo Gabinete Eman no kier laga e pueblo disfruta di e rebaho drastico aki, ya cu e prijs di gasolin a baha cu apenas 8% y prijs di diesel a baha cu solamente 10% durante e ultimo 7 añanan.
Naturalmente cu e diferencia ta bay den saco di gobierno pa nan por sigui derocha na nan viahenan di placer y na mas coordinador y pensionado pa e ministernan di AVP.
Esaki si ta un abuso di marca mayor cu Gabinete Mike Eman ta cometiendo cu e pueblo di Aruba. Na tur pais den mundo tur hende ta gosando di e rebaho drastico di e prijs di crudo, pero ta na Aruba so e pueblo no por gosa di esaki completamente.
Cu e dos ehempelnan aki partido MEP ta desenmascara Mike Eman den su mentiranan diario na pueblo y den e siguiente articulo MEP lo elabora tambe riba e desaroyo di salario minimo y di pensioen di viehez bao di Gabinete Oduber y Gabinete Eman.
Expresionnan haci den e articulo aki no necesariamente ta refleha opinion di ArenaPoliti.co