Na ocasion di apertura di Aña Parlamentario 2016-2017. 

ORANJESTAD - Gobernador Refunjol a tene su ultimo discurso na ocasion di Aña Parlamentario nobo. Su carera di mas di 12 aña ta yegando su final. Den un discurso alentador unda positivismo a domina, Gobernador Refunjol, kende ta representante di Corona, a tira un bista pa loke ta futuro di pais Aruba y kico a tuma luga den e aña cu ta tras di lomba. El a cuminsa na bisa cu tur comienso ta contene un nucleo genuino di optimismo, fe y speransa. Un sentimento cu no ta simplemente basa riba e confianza cu mayan lo ta miho cu awe, pero cu ta ta basa riba un compromiso pa haci mañan miho cu awe. Gobernador Refunjol: "Cu e mesun sentimento aki, mi tin e honor di efectua awe mainta apertura di Aña Parlamentario 2016-2017, marcando inicio di un etapa nobo unda prosperidad y oportunidadnan economico ta wordo traduci un biaha mas den bienestar pa tur esnan cu ta biba riba nos isla."

Gobernador Refunjol a menciona cu gobierno a logra entrega presupuesto di aña 2017 den e terminonan segun nos Constitucion ta prescribi. Tambe a haci esfuersonan grandi ps elimina acumulacion di retrasonan administativo na departamento di impuesto.

Gobernador: "E aña aki Gobierno di Aruba a presenta un presupuesto cu un deficit di 0.5% di GDP conforme e normanan di ley di supervision financiero temporario. Esaki ta un resultado cu a wordo alcansa cu hopi esfuerso y riba propio forsa. Presupuesto 2017 no conoce aumento di tarifa di impuesto y ta fiha e prome paso pa un reduccion di debe di pais Aruba. E logro aki a wordo haci posibel danki na un maneho financiero balansa y sin ningun ayudo financiero externo."

Pa loke ta reapertura di e refineria Gobernador a duna muestra di su satisfaccion cu e logro aki. Reapertura di e refineria ta bay duna un empuhe na nos economia, nos forsa laboral, divisanan y finansa publico. E hecho cu pa prome bes den mas di 90 aña pais Aruba ta bira doño di e refinaderia ta tremendo. "E diligencia y perseverancia di Gobierno y su ekipo, consistiendo di expertonan local y internacional, tabata clave den  haya un partner cu por a cumpli cu e rekisitonan socio-economico, como tambe medio-ambiental cu a keda fiha pa opera un refineria aki na Aruba.

Expresionnan haci den e articulo aki no necesariamente ta refleha opinion di ArenaPoliti.co