Parlamento a reuni diaranson merdia cu CAFT den un reunion di cual su contenido mester keda secreto.
"Mi mester bisa si cu mi ta mas preocupa pa e situacion financiero di nos pais. Mi no por bai den contenido di e reunion, pero mi lo menciona solamente algun conclusion cu Caft a publica den nan rapportnan anterior.

MEGA DEBE 
Den anja 2016 e MEGA DEBE di pais Aruba ta sigi crese, a subi te na 83% di GDP (fin di 2015 e tbt 82%, pues e ta sigi subi). Esey kiermeen cu di cada florin 83 cen ta bai pa paga debe y 17 cen SO ta resta pa paga gastonan. Tempo cu MEP a sali for di gobierno, el'a laga esaki 42%. Den e 7 anjanan di gabinete Mike Eman ela redobla e debe.
Consequencia di e mal maneho aki di gabinete Mike Eman ta cu nos pueblo mester paga interes gigantesco riba MEGA DEBE. Na interes riba e MEGADEBE pueblo ta paga Afl 209 miyon florin, cu ta 16% di tur e gastonan di gobierno (na 2015 e tbt 15%). Imaginabo si gabinete Mike Eman no a redobla e MEGA DEBE, lo awor nos ta pagando mitar di e suma aki na interes, y nos lo ta resta tur anja mas di 100 miyon florin pa inverti den por ehempel combati criminalidad y mehora nos scolnan.

PPP
Pa loke ta e PPP Caft ta URGI gobierno pone un norm, un maximo, maske ta esun mas halto pasobra tur pais na
mundo cu tin PPP tin un norm. Caft a propone pa Aruba maximalisa e pagonan di PPP na 1.5 pa 2% di gastonan. Pero gabinete Mike Eman ainda no kier bin cu un norm.

DEAL CU CITGO
Pa loke ta e deal cu Citgo Caft a expresa e mesun preocupacionnan cu MEP a expresa durante e debate publico: Caft a exigi di gobierno un estudio pa analisa tur e riesgonan di e proyecto: e entradanan di e refineria pa pais Aruba, e riesgonan di garantianan pa pais Aruba y "what if", kiko lo pasa si e pipa di gas no keda cla, si e garantianan wordo geclaim, etc. CAFT a exigi tambe un MER rapport di e refineria pa sa e impacto riba medio ambiente.

MAS GASTONAN
Tambe Caft ta pidi atencion pa demas gastonan. Apesar di e medida di Bazv ainda AZV tin un tekort di 16 miyon y ta pueblo mester bai paga esaki.
Ademas gobierno no a baha su gastonan di personal, manera cu gobierno mes a acorda cu Caft.
Tur e motibonan aki a lagami hopi preocupa. Mi a kere cu nos finansas publico tabata bayendo den bon caminda, pero awor ta resulta cu Gobierno no ta hasiendo suficiente pa mehora finansas publico!
Nos lo bai atende esaki cu minister Bermudez mas pronto cu ta posibel den Parlamento" lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co