E desicion pa habri e refineria, a wordo considera door di un grupo den comunidad como un desicion pa habri un industria bieuw y sushi. Un desicion cu ta bay contra di e maneho pa un economia limpi y "berde" manera AVP ta propaganda. Den bista di e grupo aki e desicion pa habri e reifneria no ta cuadra cu e maneho dirigi riba e futuro cu AVP mes kier pa Aruba. Durante di e reunion publico pa aproba e apertura di e refineria, Rene Herde' mes a toca e tema aki. Manera ta su custumber, e no ta sera orea pa niun critica. Den su propio palabranan, "bo tin cu wak problema cara a cara y solucion'e cu e forsa y e mihor cu solucionnan cu Bo tin". Esaki ta exactamente loke AVP a haci.

FUTURO
Rene Herde' a splica e desicion di AVP durante di e reunion publico den e forma aki: "Nos kier un futuro cu un economia 'berde' pa Aruba. Un economia cu no ta contamina nos medio ambiente y cu no ta trece peliger pa salud di nos hendenan. Nos a y nos lo sigui propaganda e economia "berde" aki. Pasobra nos ta convenci cu e ta miho: e ta mas sostenibel a largo plazo, e ta miho pa nos salud y pa medio ambiente. Nos ta convenci cu nos mester cuminsa construi un economia cu no ta basa riba energia fosil, manera petrolio y gas, pasobra nan ta bay caba un dia. Nos no kier haya nos mes den e situacion cu nos no ta prepara pa e dia ey den futuro. Nos mester cuminsa prepara pa ta cla prome cu e dia ey yega. Pesey nos a cuminsa construi e enonomia 'berde' pa futuro caba."

PRESENTE
Pero na mes un momento Rene Herde' a mustra riba e necesidadnan di awe den nos comunidad cu merece e mes un atencion. Rene Herde: "Nos no por sera nos wowo pa e realidad y necesidadnan di y den nos comunidad awe. Nos tin un desempleo cu a baha di 12% pa 7%, pero ainda esaki ta nifica cu tin mucho hopi hende sin trabou y entrada sigur. E hendenan aki no ta biba e bida cu nos cu tin trabou si ta biba. Nan no por mantene nan mes y nan famia manera nos ta desea pa tur hende haci. Tin mucho hopi di nan cu ta biba den situacionnan masha dificil mes. Nos no por sera wowo pa nan situacion di bida. Nos economia tin mester di mas stimulacion. Te awor ta casi gobierno so a haci inversionnan grandi pa saca nos economia di crisis. Negoshinan den hopi sector tin mester di stimulacion. Gobierno tambe por usa mas entrada pa cumpli cu tur su responsabilidadnan. Nos no por keda sin busca solucion pa tur esakinan. Mas lihe nos haci esey ta mas mas miho pa henter nos pais. E refineria ta yuda trece solucion awor aki pa nos economia, crea trabou y entrada pa hopi famia, crea trabou y entrada pa hopi negoshi local y crea entrada pa gobierno. Ta pa yuda atende cu e necesidadnan urgente aki di awe, cu a dicidi di habri e refineria."

PRESENTE Y FUTURO
Cu otro palabra, e desicion pa habri e refineria ta pa atende e necesidadnan di awe. Mientrastanto gobierno di AVP ta sigui traha y crea oportunidadnan pa e economia nobo, "berde" pa futuro. Rene Herde': "Nos no a scohe pa e un of e otro. Nos no a scohe entre presente y futuro. Nos a scohe pa tur dos. Pa atende cu e necesidadnan urgente di awe den nos comunidad. Pero alabez pa sigui traha pa crea e economia mas limpi, mas berde pa futuro di nos pais. Ta poco pais na mundo por bisa esey." Asina Rene Herde' a splica.

Expresionnan haci den e articulo aki no necesariamente ta refleha opinion di ArenaPoliti.co