Diahuebs ultimo a tuma lugar un reunion den parlamento pa trata 2 punto di agenda cualnan tawata e ley tocante penitentiaire beginselen y e otro punto di agenda tawata e aumento di criminalidad ultimo temponan. Manera ta custumber caba den parlamento ora yama ministernan pa bin duna cuenta envez cu ta haya mas informacion ta keda sin haya informacion. Durante e reunion aki fraccion di MEP a haci diferente pregunta al caso na minister di husticia Dowers cu e speranza cu nos lo haya mas claridad con gobierno y e minister en cuestion ta atendiendo cu e ola di criminalidad. Nos a puntra minister Dowers si e por informa parlamento cuanto asesinato tin registra e ultimo 7 anjanan aki. Nos a spera di por a haya un contesta riba e pregunta aki cual nos no a haya. E siguente pregunta cu nos a haci minister Dowers ta si e por informa parlamento cuanto arma di candela a wordo confisca e ultimo 7 anjanan aki. Nos a puntra minister ki accion e minister lo bai tuma pa frena e cantidad alarmanete di atraco cu tin na e momentonan aki. Nos a puntra minister dikon e situacion a sali for di man manera cu e ta na e momentonan aki. Lamentablemente nos no a haya contesta riba NINGUN di nos preguntanan y mas bien minister a bai den defense y schuif su responsabilidad di scochi di pueblo y den scochi di otro coleganan. Segun minister Dowers e problema di criminalidad ta partido MEP a causa y tur e hobenan cu ta cometiendo atraco a nace den gobernacion di MEP. Mas aleu e minister a sigui bisa cu no ta su culpa cu tin asina tanto ladronicia y atraco sino ta culpa di nos systema cu a faya, ta culpa di mayornan cu no por educa nan yuinan. Ora un minister bisa esaki nos mester puntra nos mes kende ta den gobierno e ultimo 7 anjanan aki? Si e systema a faya ta kende ta responsabel pa corregi e systema cu segun minister Dowers a faya. Ironia ta cu tempo Dowers tawata den opiscion ta e  ex ministerdi husticia y e gobierno anterior tawata culpabel y responsabel di tur cos. Awe cu e ta minister e ta culpa tur hende, e ta culpa MEP, e ta culpa mayornan, e ta culpa sociedad, e ta culpa e systema sin cu mes ta asumi su respnsabilidad. E ta esun cu ta politicamente responsabel pa e chaos cu a wordo crea. Na e momentonan akin a anja 2016 tin 53 atraco registra cualnan ta atraconan cu a wordo cometi cu arma di candela. Ta un situaccion hopi pero hopi preoccupante cu tin na e momentonan aki. Tin un commission di siguridad cu ta organisando un marcha y nos sigur ta sostene e marcha aki y ta haci un yamamda nah enter e comunidad di Aruba pa hunto pa ban pone un paro na e ola di criminalidad y ban exigi gobierno tuma accion pa nos por biba den trankilidad. E marcha lo ta dia 13 di oktober y nos ta spera cu por conta cu tur esnan cu ta preocupa cu e insiguridad cu tin na Aruba. Ban nos tur hunto, demostra union pa un causa husto, nos SIGURIDAD!

Expresionnan haci den e articulo aki no necesariamente ta refleha opinion di ArenaPoliti.co