Un iniciativa di Gabinete Mike Eman cu cooperacion estrecho di Ministerio di Defensa di Reino
Prome Minister Mike Eman na 2010 a cuminsa preparacionnan pa inicia un programa noble cu e meta pa duna un man na e grupo di hoben cu pa circunstancianan di bida a desvia y a cay den un direccion menos bon: E Sociaal Vormingstraject of miho conoci pa su nomber na Papiamento, Formacion Social. Awo, 5 aña despues, e di 7 grupo di hoben cu ta participa den e programa aki, dialuna ultimo a cuminsa cu e proceso pa trece un cambio den nan bida bou guia di un grupo di profesional militar y civil, lidera pa Jessy Ras y Teniente Lorenzo Texeira.

"Mi ta masha agradecido na Gobierno di Mike Eman pa a bini cu un programa asina cu ta yuda e hobennan di Aruba pa haya e rumbo bek den nan bida," tabata un di e comentarionan ricibi for di un mayor di un participante di Grupo 5, kendenan lo gradua otro siman dialuna. E ta un opinion cu ta wordo comparti pa hopi.

Remarcabel ta cu hopi cu no a logra un prome biaha, ta bolbe purba, manera ta e caso cu dos hoben cu a drenta den grupo 7, esta Gibbs y Geerman, mientras cu tambe tin dos ruman participando di cual un di nan a yega di bandona e programa aki den pasado. Cada un di nan ta mustra riba e hecho cu e biaha aki ta nan mes a scoge pa cuminsa di nobo. Ta di remarca tambe cu hobennan cu a yega di caba e programa aki ta encurasha nan ruman of amigonan pa inscribi, ya cu e programa aki ta un instrumento pa yega den e mercado laboral y/of finalisa scol.

Randy Larmonie, di 18 aña, a dicidi cu ta momento pa haci algo cu su bida. "Tur hende sa kico un hoben cu keda 3 aña na cas sin haci nada lo por haya su mes aden y e caminda cu e lo por coy," tabata e comentario di e hoben mes dialuna na momento cu el a caba di drenta Kazerne pa inicia e programa di Formacion Social.

E programa aki ta un orguyo pa Prome Minister Mike Eman. El a yega di bisa e hobennan: "E motibonan pakico un hoben ta dicidi di tuma e reto aki cu mas bien ta un di dos oportunidad den bida pa nan mes, ta varia di persona pa persona. Algun kier duna un cambio di 180 grado na su bida mientras pa otronan ta mas importante pa duna nan mayornan, wela y otro sernan stima e sosiego mental y den alma di por wak nan riba un miho caminda. Alabes, boso ta sinti boso mes contento di haci nan contento, pero boso a haci Aruba hopi contento tambe y hopi orguyoso." Esey ta e caso di e hoben Amiel Gibbs, kende a expresa otro biahanan el a wordo pusha door di famia pero e biaha aki e tabata su propio decision pa participa.

E ley di Formacion Social a wordo aproba na 2011 y a inicia for di un cooperacion entre Ministerio di Asuntonan General di Aruba, Ministerio di Defensa Hulandes y varios partnernan local y di Reino. E programa aki ta consisti di dos parti cu ta un trainingstraject y opleidingstraject. E ta duna e hoben un base amplio pa su desaroyo personal y intelectual y tin un duracion di 1 aña!

E hobennan di Grupo 7 dialuna mainta a wordo splica cu nan lo haya un guia completo, tanto di e parti spiritual, social, militar como educativo. Pero principalmente e principio di "respeta propiedad di otro y percura semper pa yuda bo compañero y otronan,"tabata loke instructor principal, Sargento Dijkhoff, a bisa e participantenan.

Dialuna awor Prome Minister Eman cu orguyo lo entrega certificado na esnan di Grupo 5 cu a finalisa e trayecto. Mas cu 100 hoben a haya e chens pa participa den e programa aki cu a inicia bou di Gabinete Mike Eman I. Un iniciativa cu ta haya bon acogida tur caminda.

Expresionnan haci den e articulo aki no necesariamente ta refleha opinion di ArenaPoliti.co