Ta djis un cuestion di tempo, di algun siman.

Bo tambe a constata cuanto ta e casonan di fraude na e momentonan aki? Asuntonan straño cu e primanan di seguro di 28.000 studiante na Hulanda, e manipulacionnan cu permisonan di trabao cu ta wordo otorga sin cu NUNCA e documentonan a pasa jobcenter, otro permisonan di trabao pa un empresa cu a sera porta ya ta mas cu 1 aña.


E ministernan di AVP ta gara locual nan por, awor cu esey por ainda.
Un comerciante “just like that” mag di basha un cas abao cu ta riba e lista di monumento, y como recompensa ademas e ta haya un permiso di operacion di Otnar Oduber pa un cuminda vies y vet di Burger King; edificionan misterioso cu diripiente ta lanta na Nikky Beach. Bo sa toch kiko tur esey kier meen? Exactamente: e ministernan ta gara locual nan por gara ainda, prome cu nan mester baha. Y baha nan lo baha! Un organisacion nobo lo para garantia pa esey! “Nos ta Aruba” ta un combinacion local di cooperacion a base voluntario, entre e organisacionnan den comunidad “Nos Pais Aruba”, “Ta Basta”, Grupo 7, Comision Accion Nacional (CAN), e sindicato di empleado publico TOPA y e sindicatonan SCCA y STA.


Nos ta Aruba
Recientemente, esta dia 7 di januari 2015, “Nos ta Aruba” a pidi gobierno di Reino y Gobernador pa interveni a base di e asina yama “waarborgfunctie” describi den Statuut, articulo 43, segundo paragrafo encuanto e “rechtszekerheid” y e “deugdelijkheid van bestuur”, pasobra esakinan ta den peliger eminente. Riba Aruba ta existi un situacion intolerabel unda e “rechtszekerheid” (seguridad/garantia di derecho) y e “deugdelijk bestuur” (gobernacion di bon calidad) no solamente ta core peliger eminente, pero hasta ya no ta existi mas, y e situacion aki no por wordo remedia door di instancianan riba Aruba mes, locual obligatoriamente ta conduci na intervencion door di Reino, cu tampoco no por tarda mas pa tuma lugar.


Dos biaha “kiezersbedrog”
Na aña 2009 AVP a comete “kiezersbedrog” (manipulacion, engaño, trampa, estafa pa gana eleccion) cu nan promesa falso pa kita e BBO di 3%, mientras cu na 2013 AVP atrobe a comete “kiezersbedrog”, y awor cu e promesa na Pueblo cu AVP, despues di gana eleccion, lo NO tuma medida contra Pueblo. Pasobra, segun AVP, ta unicamente for di MEP so, e Pueblo por spera medida! Despues di 2009 AVP no a wordo stroba door di ningun partner di coalicion fastioso, no dispuesto pa coopera, pasobra cu un mayoria den Parlamento, pues nan so, AVP por a eherce un maneho, cu a resulta escandalosamente malo pa Aruba, y pa cua awor nan mester para completamente responsabel. Un maneho riba tereno financiero y economico cu ta fayando barbaramente, y un debe di estado impagabel di 6.000 miyon (6.000.000.000,00) florin; tur caminda empresanan cu ta sera; turismo cu menos estadia den hotel, y mas y mas hende di habla Spaño cu ta keda den apartamentonan chikito, ta move riba e isla na pia, ta cumpra un bleki di Cola den supermarktnan chikito Chines, y cu ta tuma nan baño den e fonteinnan den Caya Betico Croes; ministernan cu ta horta y ta pluma nos isla, cu ta prefera di pasa nan tempo cometiendo fraude, na lugar di traha pa nos Pais; 6000 vivienda cu no por paga nan cuenta di coriente, y ningun instancia riba Aruba cu por, of cu KIER haci algo al respeto.


Aruba ta na werki y den bancarota.
NO tin un asina yama “ombudsman”; Parlamento ya pa 5 aña no ta eherce ningun control riba gobierno, y ya no ta funciona mas! Polis, husticia y prensa, cu excepcion di un solo matutino, ta den man di gobierno; Raad van Advies y Algemene Rekenkamer no ta wordo scucha, pero al contrario hasta ta wordo insulta. Ciudadanonan manera Sra. Edwina Henriquez y Sr. Rocky Kelly sin ningun consideracion ta wordo deteni, pero Mike Eman sí ta ser permiti pa ocupa y blokia un parti vital di ciudad, sin cu polis of husticia ta actua. E comico y payaso Otnar Oduber mag di comete fraude y corupcion den e proyecto Hard Rock Hotel, y “premier” Mike Eman ta permiti esey, no ta haci contra esaki, y pues ta complice den e atropeyo aki contra nos estado di derecho. Garantia di derecho (“Rechtszekerheid”) y gobernacion di bon calidad (“behoorlijk bestuur”) NO ta existi riba Aruba, y e “waarborgtaak” (tarea di garantisa e derechonan) di Reino mester wordo aplica y eherce urgentemente.


Kiko “Nos ta Aruba” kier logra?
“Nos ta Aruba” na prome lugar a exigi retiro di gobierno Eman 2, y ademas un investigacion “WODC” di tur e casonan di fraude y corupcion riba Aruba, sino un investigacion door di un “Koninkrijksonderzoekscommissie” nombra mediante un KB, unda empleadonan publico ta wordo dispensa/exonera di nan obligacion di secrecia (ambtelijke geheimhouding), y tin garantia completo di no persecusion politico. “Nos ta Aruba” ta boga pa un solucion pa e problemanan financiero di Aruba, SIN ningun medida contra e Pueblo y comercio; cancelacion di tur proyecto PPP, incluso cancelacion di e mulinanan di biento na Uridrama, pero cu excepcion di e Ringweg cu ta bay pa hotelnan; no desmantela e refineria, pa prome duna un oportunidad na tur oferta; nombramento di e mihor profesionalnan riba nos isla, cu banda di e ministernan mester bay determina un maneho  profesional; institui un Dialogo Nacional den cua e 15 segmentonan di nos comunidad por persigui y defende nan interesnan; regula legalmente investigacionnan riba integridad dentro di e cuerpo di empleado publico, y elimina inmunidad; regula donacionnan na partidonan politico, y implementa totalmente un bon gobierno y decente riba Aruba.


Kiko ta e caminda pa yega asina leu?
Den e proximo simannan “Nos ta Aruba” lo bay reforza su mes cu otro grupo- y organisacionnan riba e isla, y pronto lo representa mas di 50% di e comunidad. Sigur den luna di februari nos ta spera accion di gobierno di Reino; di acuerdo cu Statuut, Reino mes lo por tuma e medidanan cu e ta considera mas apropia en bista di e situacion.
Ta existi hasta e posibilidad cu ta bay conseha Mike Eman pa e mes retira pa evita pio riba e isla. Disolve Parlamento ta un posibilidad real y realistico. Nombracion di un gobierno temporal ta un posibilidad, pero esey lo mester ta si un gabinete di profesionalnan, y sigur no un zakenkabinet. Y si gobierno di Reino ta prefera pa sinta haci nada, e ora ey den luna di maart e huelganan lo bin, y e ora ey ningun hende lo por premira kiko ta bay pasa, pasobra e ora ey emocionnan lo bay halto, y ningun hende lo por pronostica kiko esey lo tin como consecuencia.

Expresionnan haci den e articulo aki no necesariamente ta refleha opinion di ArenaPoliti.co