Otmar Oduber a ganja Parlamento 
Parlamento a trata e presupuesto pa e fondo di turismo Tourism Product and Enhancement Fund pa 2017. E fondo cu ex minister Otmar Oduber a lanta, pa por financia su campanjanan politico atraves di ATA. E fondo aki nunca a duna cuenta na kiko e placa a wordo gasta. 

Na cabes di e fondo tin un board, cu ta consisti di personanan cu ta traha den sector priva, y cu tin cu cumpli cu cuentanan annual pa nan companianan. Toch, riba instruccion di Otmar Oduber, nunca e board a laga traha e cuentanan annual pa e fondo. Puntra bo mes dicon no! 

Den ultimo anjanan e fraccion di MEP, cu ta practicamente e UNICO cu ta hiba oposicion den Parlamento, a exigi pa haya e cuentanan annual. AVP y PDR semper a bisa cu no ta necesario, mustrando claramente cu nan no ta interesa di hasi nan trabou como parlamentario, di controla gobierno. 

Ex minister Otmar Oduber anja pasa ainda a segura Parlamento cu el’a duna instruccion na e compania di accountant Deloite, pa traha e cuentanan annual, y cu nan ta ‘casi’ cla. E anja aki ainda Parlamento no a haya ningun cuenta annual.

Awor minister di turismo nobo Mike de Mesa a desenmascara Otmar Oduber; NUNCA opdracht a bai pa Deloite, Otmar Oduber a ganja parlamento.

Awor numa minister de Mesa a pidi Directie Financien y Centrale Accountantsdienst pa prepara un relato financiero di e fondo, y a priminti cu esaki lo keda cla den e prome kwartaal di 2017. Cu esaki tin otro prueba mas di e mentiranan di Otmar Oduber, cu awor ta pretende di ta un politico ‘renoba’, un politico cu a bira bon hende.

Ta bon cu ningun hende mas ta kere e tipo di manipulacionnan aki. Otmar Oduber regularmente a ganja Parlamento. Pero e mas tristo ta cu e fraccion di AVP a laga nan mes wordo enganja pa e persona aki, y cu AVP no ta tuma ningun medida contra dje.

Expresionnan haci den e articulo aki no necesariamente ta refleha opinion di ArenaPoliti.co