Na aña 2015 nos Lider Sra. Evelyn Wever Croes a duna di conoce cu e ley di CFT lo no tin influencia riba e mal maneho hiba door di Gabinete Mike Eman desde 2009-2013 unda a redobla nos debe nacional. Y awe nos lider a bolbe haya rason. Desde inicio di GE nos ta bin ta bisa cu e Gabinete su prioridadnan ta robes y cada biaha nos di MEP ta haya rason.

ATV canal di Mike
No ta un secreto cu varios compania di famia Eman a bati bancarota sea den pasado y actualmente cu ATV. E compania no a paga huur y a wordo saca na un manera menos bon despues di a perde caso den corte. Tele Aruba a hera wordo bendi den pasado pa Mike su ruman homber despues cu nos ex-Lider Nelson Oduber a cera e canal nacional pa un tempo y despues a logra habri esaki bek salbando patrimonio di nos pueblo. Colmo de los colmos, Sr. Eman a hinca trahadornan di su compania ATV den Tele Aruba cu awor parce mas TeleAVP. No tin limite cu abusonan di fondo publico. Sr. Eman mester contesta preguntanan di Parlamento cu a bira un dictadura total. Su Minister Benny (90.000 m2) ta papia cuater ora den Parlamento y contesta dos pregunta. Un berguensa total nos democracia parlamentario a para bira.

Carubbian Festival di Otmar
Un otro berguensa pa Gabinete Eman. Despues cu e festival aki a wordo cancela dos biaha den periodo di 5 aña, e prome y e di dos grupo a haci un fiesta bao ex-Minister fracasa Otmar Oduber di Forsa (Bobo) Nobo. 
Otmar a retira sin entrega cifranan di ATA-Bank, Aruparking y awo Carubbian Festival a resulta den un fiesta cu fondonan publico sin fin. Segun e Minister nobo di Turismo a confirma "Iregularidadnan” (Ladronicia den Papiamento crioyo) cu por cierto esaki ta su di tres cartera den e ultimo 7 añanan. Di Finanzas (Megadebe) pa Economia (Megahedging) pa awor Turismo cu ta den un decadencia total, hasta unda hotelnan no ta paga bonus y hasta ta reduci salarionan di nan trahadornan. Otmar Oduber a gaña Parlamento di Aruba un bes mas manera el a haci’e den tratamento di varios ley. Sr. De Meza a confirma cu nunca e compania Deloitte a haya instruccion pa traha riba e cuentanan anual. Ta awo Sr. De Meza a pidi Directie Financien y CAD pa prepara un relato financiero. Berguensa ta tiki cu e hendenan aki.

Aruparking y Parkeermeters 
Comerciantenan no por mas y a duna Gobierno ultimatum te cu 3 di januari 2017 of lo pone Caya Betico Croes plat pasobra nan no por wanta mas. E relatonan financiero di Arutram y Aruparking te ainda no ta conoci pa Parlamento. E cos aki ta gewoon ladronicia den dia cla cu fondonan publico. Sr. Eman a prefera di BOICOTIA e proyecto di Havo/Vwo school di Noord y perhudica nos yiunan y awo unico cos a sali na cla ta cu e proyecto di Tram ta un fracaso total. Den oposicion Sr. Eman tawata contra e proyecto di Sr. Raoul Henriquez bao gobierno di MEP. Awe unico exito di e locura aki ta un Award di New York tanto pa Sr. Eman y Sr. Sevinger.

Gritonan di e marionetanan den fraccion di AVP. Sr. Herde no tin berguensa mas pa e desorden crea desde 2009 y ta sigui trapa riba tur ley di bon gobernacion. Hasta e ta admiti cu den 30 aña nunca a trata presupuesto di 2017, cuentanan anual di 2015 y tambe un presupuesto supletorio di 2016. Oto muestra cu CFT t’ey pa spek en bonen. Parlamentario Chris Dammers (AVP) tin e corahe di bisa cu MEP no kier proyectonan di embeyecimento pa San Nicolas via Tourism Product and Enhancement Fund (TPEF), lubidando cu e fondo aki NO a entrega relato financiero desde 2012. Publicamente Sr. Dammers ta aproba LADRONICIA mescos cu Sr. Herde den pasado e expresa esaki den Parlamento. E partido aki pueblo tin cu manda cas pa semper perhudicando nos pais/pueblo te 2040 cu e mentalidad coruptivo y gastamento di fondonan publico manera Alibaba y su grupo di ladronnan. Hasta e compania spirito di ATV a filma e concierto di miseria ultimo weekend, pues e fiesta ta sigui te cu pueblo dicidi.

Expresionnan haci den e articulo aki no necesariamente ta refleha opinion di ArenaPoliti.co