Hopi di nos kisas no tabata tin e dicha di por a conoce Betico Croes, como e hende, e politico, e gran estadista y e Libertador di nos Pais personalmente. Pero cada un di nos por lo general conoce su nomber, conoce algun di su logronan y ta disfruta di e trabou incansabel cu Betico a haci pa Aruba. Betico Croes ta un di e politiconan cu mas a resalta pa su trabou, e manera con el a sa di uni e Pueblo di Aruba y e determinacion pa logra e libertad cu ta permiti nos progresa como Pais.

Union y determincacion pa logra 
E curashi pa uni un Pueblo y e determincacion pa haci todo por todo pa por logra e libertad den cual nos Pueblo y Pais por progresa, ta bon ehempelnan cu Betico Croes a laga atras cu te ainda ta relevante y ta bale la pena pa sigui. Betico Croes a haci nos consciente di e balor cu nos tin como un Pueblo den union y a brinda e ehempel cu ora bo ta determina bo por logra cosnan grandi cu ta beneficia no solamente bo mesun generacion, pero tambe e generacionnan cu ta sigui. Danki na Betico awe nos por papia di un Pais den cual nos Pueblo por identifica su mes cu nos propio idioma y ortografia na Papiamento, nos propio Himno y Bandera y nos propio moneda como simbolonan di nos identidad. Den aña 2017 y specialmente riba Dia di Betico 25 januari proximo, ban tuma tempo pa nos repasa kico tur Betico Croes a haci pa nos Pais, y ban sigui su ehempel di union y determinacion pa nos por logra biba un bida digno den e Libertad cu e Status Aparte ta brinda nos den Reino Hulandes. 

Ban record’e y celebr’e 
Laga nos busca pa sa mas di Betico Croes, su bida, su lucha y su logronan bishitando su museo na Santa Cruz pa haya informacion. Nos ta encurasha bo pa pasa bishita e diferente actividadnan rond nos Isla riba Dia di Betico y nos ta extende un cordial invitacion pa asisti na e actividad di nos partido MEP en conexion cu e fecha natalicio di nos Lider inmortal Betico Croes cu reconocemento di Caciquenan di MEP y lansamento di nos hala hubenil HOT den e ambiente di concierto di D’licious, Buleria y Jeon den curason di Savaneta na e CEDE di MEP net otro banda di Wintergarden dia 24 di januari cuminsando for di 6’or pm. Nos ta warda bo pa nos celebra hunto e bida y logronan pa nos Pais di nos Libertador Betico Croes.

Expresionnan haci den e articulo aki no necesariamente ta refleha opinion di ArenaPoliti.co