Otmar Oduber (POR): Dunamento tereno di cas y comercial mester ta transparente y lo ta bek central na e departamento concerni despues di september
Otmar Oduber di e plataforma politico POR a expresa cu dunamento di tereno di cas y tereno comercial mester ta transparente y lo ta bek central na e departamento concerni despues di september ora cu POR drenta gobernacion.
Durante conferencia di prensa di E Forsa Nobo, Otmar Oduber a bisa claramente cu despues cu siman pasa a atende e tema di dunamento di tereno, a haya un avalancha di yamadanan di disgusto pa loke ta e maneho cu ta wordo hiba na Aruba.
Pa loke ta otorgamento di tereno pa cas ta calcula cu miles y miles di peticion a wordo firma dor di e Minister actual di Infrastructura y lamentablemente e hendenan no ta hayando e tereno siendo cu ta bayendo pa 3,4 of 5 aña cu a firma. E minister ta pone riba e papel akkoord conform, cual e minister mes a bisa cu no ta un akkoord pa e ciudadano haya un tereno, pero cu ta un akkoord pa e departamento cuminsa traha riba e posibilidad pa un persona haya tereno den nos comunidad.
“E ta un disgusto enorme den nos comunidad, pero mas cu tur ta cu nos ta bisa cu e epoca di PPK kaart a wordo elimina cu AZV, pero e minister di Infrastructura aki a introduci un PPK nobo pa tereno caminda cu bo mester para na su porta di cas 4or of 5or di marduga of mester warde den parkinglot di Bestuurskantoor. Esaki pasobra e minister ta esun cu ta otorga tereno na Aruba”, Otmar Oduber a duna di conoce.
Plataforma E Forsa Nobo, POR ta bisa bon cla cu despues di september e maneho di tereno mester ta:
- Transparente, pueblo mester por sa, mester por ofrece e seguimento electronico di e peticion haci pa un tereno;
- Centralisa pafor di man di politica evitando asina cu un hende mester roga na un despacho di un minister pa por haya tereno, como si fuera e no ta un derecho pa por haya un pida tereno pa por traha un cas.
E ta agrega cu e intencion di elimina e rogamento cerca un minister ta algo cu definitivamente mester pasa pa pasado.
Mescos ta e caso pa loke ta terenonan comercial. No por ta asina cu for di despacho di minister ta dicidi ken ta haya un pida tereno, cuanto e mag di haya y tur esaki sin cu tin un transparencia.
E proceso aki tambe mester bay den un forma transparente y habri cu oportunidadnan igual pa tur hende por logra esaki.
Dor cu a politiza asina hopi e procesonan ta pone cu hendenan no tin mas confianza den nan y pesey POR ta bisa cu nan mester wordo centraliza na e departamento cu un maneho cla, raspa, habri y transparente pa comunidad pa ora nan haci un peticion pa un tereno pa un cas of un tereno pa negoshi nan sinti cu nan ta wordo trata na e forma mas husto posibel.
Expresionnan haci den e articulo aki no necesariamente ta refleha opinion di ArenaPoliti.co