Minister Juan David Yrausquin: "Aruba henter por ta orguyoso cu e logro di e gobierno aki"
Minister Plenipotenciario Juan David Yrausquin masha satisfecho cu declaracionnan di Plasterk
ORANJESTAD - Na su salida di Aruba Minister Plenipotenciario Juan David Yrausquin kende tabata aki pa atende e congresonan di OCTA, BEST y Sustainable Development Goals, a bisa di tabata masha satisfecho cu e declaracion di Minister Plaserk kende tambe tabata na Aruba. "E felicitacion di Minister Plasterk na Minister Bermudez tabata na su lugar."
Minister Yrausquin a sigui bisa cu ta masha hopi esfuerso a wordo haci e ultimo añanan pa adresa e retonan cu tabatin riba e parti economico den e prome 4 añanan y e ultimo periodo di 4 aña aki riba e retonan cu tabatin riba tereno financiero, caminda minister Bermudez tabatin un rol hopi importante. E reformanan di pensioen cu a wordo haci tabata necesario pa por a yuda Aruba cu e retonan cu tabatin. Yrausquin: "Mi ta masha contento cu e felicitacion di Plasterk. Tambe di e reconocimento internacional cu e gobierno a haya pa loke ta su finanzas publico. Aprobacion di Cft pa presupuesto 2017 ta duna un confiansa na gobierno y tambe comunidad di Aruba pa loke ta e direccion cu gobierno di Aruba ta bayendo y esfuersonan cu gobierno a haci den e ultimo añanan."
Minister Plenipotenciario Yrausquin, kende tabata Minister di Finanzas, a bisa di tabatin pleno confiansa cu Aruba lo a yega na unda e ta awe cu un presupuesto cu un deficit di solamente 0,5% y tur riba propio forsa. Awe Cft ta admiti esey y e minister encarga cu Asuntonan di Relacionnan den Reino Ronald Plasterk no a keda nada otro di felicita Minister Bermudez y gobierno henter pa e logro aki. Plasterk den un declaracion duna a bisa cu e esfuersonan di Aruba ta un 'knap staaltje werk'.
Yrausquin: "Nos a bay eleccion cu un liña, esta cu nos ta bay atende Finanzas Publico cu reforma y acuerdonan cu partnernan social. Esaki a wordo logra. Awor na 2017 Gabinete Mike Eman a logra un presupuesto cu un deficit di 0,5% loke ta algo historico. Aña pasa e deficit tabata 2% mescos cu e aña prome cu esey. Esaki ta muestra cu Finanzas Publico ta solido y bayendo den hopi bon direccion. Mi ta kere cu henter pueblo Arubano por ta satisfecho y orguyoso di e trabounan cu a wordo haci e ultimo añanan. Particularmente mi kier reconoce mi colega Angel Bermudez pa su esfuersonan, pero sigur tambe henter Gabinete Mike Eman. Loke ta haci mi mas orguyoso asina ta cu den henter Conseho di Reino, unda mi ta representa e pueblo Arubano y gobierno di Aruba, mi ta experiencia e reconocimento pa e esfuersonan aki."
Expresionnan haci den e articulo aki no necesariamente ta refleha opinion di ArenaPoliti.co