Desaroyo monetario 
Den e luna di Januari 2017, e cantidad di placa den circulacion a subi cu Afl. 38.8 miyon te na Afl. 4.205,3 miyon, compara cu December 2016. Esaki a wordo causa door di un crecemento den e reserva di divisa netto (+Afl. 58,7 miyon) y un bahada den e activo domestico netto (-Afl. 19,8 miyon). 

E subida den e reserva di divisa netto di e sector bancario ta debi na compra netto di divisa for di publico(+Afl. 243,9 miyon), principalmente relaciona cu turismo. Esaki a wordo parcialmente mitiga pa benta netto di divisa na publico (-Afl. 185.3 miyon), primordialmente relaciona cu pago netto pa importacion di mercancia y otro servicionan. 

E reduccion den e activo domestico netto a surgi door di un bahada den tanto credito domestico (-Afl. 13,3 miyon) y transaccionnan no relata na credito (-Afl.6,5 miyon). E ultimo a wordo causa principalmente door di un subida den e asina jama “allocated loan loss provisions” y transaccionan di clearing. 

Credito domestico a disminui, como resultado di bahadanan den credito bancario netto na e sector publico (-Afl. 8,2 miyon) y credito bancario na e sector priva (-Afl. 5,1 miyon). E caida den credito bancario netto na sector publico ta relaciona principalmenta cu un subida den depositonan di gobierna (+Afl. 10,6 miyon). E bahada den credito na e sector priva a resulta for di menos credito na consumidor (-Afl. 3,6 miyon), credito na empresa (-Afl. 0,8 miyon) y hipoteca pa vivienda (-Afl. 0,8 miyon). 

Inflacion 
E nivel general di prijs, cu ta wordo midi door di e indice di prijs di consumo, a registra un bahada di 0,4 porciento den e luna di Januari 2017, compara cu Januari 2016. E contribuyente principal na e caida aki ta e componente “Vivienda”, cual ta debi primordialmente na un reduccion den prijs di electricidad. Tambe, e componentenan “Paña y Sapato” y “Recreacion y Cultura” a contribui na e caida aki. Di otro banda, e componentenan “Transporte”, “Mobilario” y “Restaurant y Hotel” a registra un subida. Si exclui e componentenan di cuminda y energia for di e indice di prijs di consumo, inflacion ta mustra un crecemento di 0,2 porciento compara cu Januari 2016. Pa loke ta trata e promedio anual di e tasa di inflacion, esaki a keda mescos na -0,9 porciento na Januari 2017, compara cu December 2016.

Turismo
Na Januari 2017, e cantidad di turista a registra 89.269 bishitante, cual tabata 14,2 porciento (-14.803 bishitante) menos cu na Januari 2016. E caida aki a resulta principalmente door di un bahada den e mercado Latino Americano di 50,0 porciento (-18.203 bishitante). Di otro banda, e mercado Norte Americano a crece cu 8,9 porciento (5.033 bishitante).

E caida den e mercado Latino Americano a wordo causa pa menos bishitante for di Venezuela (-19.056 bishitante of -68,2 porciento). E subida den e mercado Norte Americano a resulta mas tanto for di un expansion den bishitante for di Merca (+4.279 bishitante of 8,4 porciento).

E cantidad di turista crucero a registra un caida di 11.800 bishitante of 11,6 porciento te na 89.734 na Januari 2017, compara cu Januari 2016. E cantidad di barconan a baha, for di 52 na Januari 2016 pa 44 na Januari 2017.

Entrada di Gobierno
Tuma nota cu e cifranan di entrada di gobierno no tabata disponibel na momento di publicacion di e relato aki.


Banco Central di Aruba
8 Maart 2o17

Expresionnan haci den e articulo aki no necesariamente ta refleha opinion di ArenaPoliti.co