Facilita proceso di tereno como estimulo pa sector priva 
Ademas di concreta y continua cu proyectonan publico 
Minister Benny Sevinger a duna di conoce ayera mainta e obhetivonan principal di su Ministerio pa 2015, specificamente den e tereno di infrastructura. Esaki tabata e tema principal di e conferencia di prensa semanal di Gobierno di Aruba. Despues cu e lista di proyectonan inicia y ehecuta pa Gabinete Mike Eman durante ultimo añanan a baha for di mas cu 100, pa actualmente bou 70, e mandatario ta delinea un maneho cu lo sigui sostene e industria local di construccion, pero incluyendo tambe e sector priva. 

“Den 2015 a pone dos punto di salida pa infrastructura: Un ta caba e proyectonan cu ta andando, prepara e proyectonan cu mester bin y e otro parti ta pa stimula proyectonan di sector priva colaborando cu e parti di tereno y permiso di construccion,” segun Minister Sevinger.

Relaciona cu esaki, Minister Sevinger a sostene diferente reunion cu e departamentonan concerni. Tambe el a indica cu su Ministerio a pidi ayudo Kadaster na Hulanda pa cu e proceso di midimento di tereno. Gobierno a ricibi un oferta cu ta inclui tambe e coreccion di liñanan. Basa riba esaki, e titular di infrastructura ta keda cu den un par di luna por actualisa e retraso cu tin.

“Hunto cu oficinanan di notario ta bay realisa e proceso pa esaki bira mas lihe y adecua y asina proyectonan por start, tanto di Gobierno como priva,” Minister Sevinger a splica. E mandatario encarga cu infrastructura tambe a reuni cu DIP y DOW, pasobra nan tambe ta carga un papel clave den e plannan aki, specialmente den caso di proyectonan di vivienda. A splica cu kier crea un contacto mas practico cu e cliente, pa medio di cual ta soluciona cualkier asunto mas lihe y facil.

Minister Sevinger a bisa cu “ta bezig ta wak tur proyecto di vivienda y comercial di sector priva pa purba pusha nan y por start mas lihe posibel cu ta trece cu companianan di construccion ta haya trabou, sub-contratistanan tambe ta haya y nan empleadonan ta haya un entrada cu por inverti bek den nos economia.” Finalmente a indica cu lo adapta reglanan pa asina por cumpli cu e demanda di sector priva.

Expresionnan haci den e articulo aki no necesariamente ta refleha opinion di ArenaPoliti.co