Colegio EPI a organisa un debate politico pa e studiantenan di tweede klas cu ta bezig cu e projecto cu tin como tema "Verkiezing 2017, politieke partijen en hun economische doelstellingen".

E meta ta pa e studiantenan haña informacion ariba e vision y programma di cada partido invita pa loke ta trata e economia di Aruba. E partidonan invita na e debate aki tabata MEP, AVP, RED y POR. E studiantenan ta first time voters y e meta ta pa nan forma nan mesun opinion ariba e topico aki.
Cada partido a expone e ideologia di nan partido, e vision y programa di nan partido ariba e tereno di economia y con ta bai realisa e economische doelstellingen nan aki.

Lider di MEP Evelyn Wever-Croes a representa MEP y a comparti e vision di MEP riba varios tereno.
E vision economico no por wordo mira los di vision general di partido, cu ta pa cambia e rumbo di nos pais y pone e prioridad na e ser humano. Pa hasi Aruba sigur atrobe, pa baha costo di bida y pa mehora calidad di enseñansa.

Riba tereno economico MEP a presenta e vision pa fortifica e pilarnan economico existente, crea pilarnan nobo y percura pa tur ta dirigi pa genera empleo pa nos hendenan prome.

"Mi ta elogia EPI cu e iniciativa aki y mi ta gradisi nan pa e invitacion. E hobennan a demostra cu nan ta critico y nan no ta tuma cualquier contesta. Mi ta haya esey bon pasobra ta nan mester bai paga e debe di pais Aruba. Mi a haya e debate aki uno hopi exitoso" Evelyn Wever-Croes a duna di conose.

Lider di MEP Evelyn Wever-Croes a trese e puntonan na forma consiso y profesional y e studiantenan a keda hopi satisfecho cu e informacion comparti. 

Expresionnan haci den e articulo aki no necesariamente ta refleha opinion di ArenaPoliti.co