Durante e reunion publico pa atende e asunto di Minister Croes, un biaha mas a bira bisto cu AVP ta brasa corupcion enves di bringa corupcion. E Minister di Labor ta wordo sospecha di a tuma placa di soborno y di a laba e placa mal haya aki. Un sospecho serio pa cual hasta tabata tin un entrada hudicial na su cas di entre otro RST y FIOD. Asina mes e Parlamentarionan di AVP no kier atende debidamente cu e asunto serio aki.

Confiansa perdi 
E unico pregunta cu Parlamento henter mester a contesta ta, si un Minister bou sospecho penal por sigi goza di e confiansa di Parlamento di Aruba pa sigi labora den e funcion como un Minister di nos Pais Aruba. Un pregunta cu ta basa riba locual nos Constitucion ta stipula den Articulo 2.2 inciso 2. Cualkier persona cu fatsoen lo bisa cu un Minister bou investigacion pa acusacion asina grave no por sigi den funcion. Ta imposibel cu Parlamento por tin confiansa den un persona cu ta wordo sospecha di a abusa di nos leynan y di e mesun Pueblo cu ela priminti pa sirbi. E solo hecho cu e Parlamentarionan di AVP no kier atende cu e caso serio aki ta muestra cu nan ta prefera di brasa corupcion pa nan salba cara di nan colega di partido enves di sali na vanguardia di e Pueblo cu ta wordo perhudica cu e corupcion di cual e colega Minister Croes ta wordo sospecha di ta participe. 

Tuma retiro of wordo retira 
Un mandatario cu haya su mes envolvi cu husticia di e manera ey, lo mester a tuma su retiro pendiente su caso.  Si riba su mes e Minister no ta tuma honor na su mes, e ora Parlamento mester dune su retiro a base di e falta di confiansa den su persona. Asina e cosnan lo mester a bay normalmente. Pero nos tur por mira cu e Gobierno aki, su Ministernan y Parlamentarionan no tin fatsoen politico y pesey ta permiti pa sr Croes keda sinta como Minister di nos Pais bou sospecho di soborno y labamento di placa.

Brasa corupcion enves di bringe 
Tur locual ta pasando aki ta un berguensa grandi pa nos Pais. E ta un berguensa grandi pa tin un Minister sospecha di corupcion y labamento di placa y mas berguensa ta pa tin Parlamentarionan di AVP cu ta para bati man y brasa e corupcion enves di haci lo corecto di kita nan confiansa den un Minister cu ta sospecha di a burla di nos leynan y di nos Pueblo. Locual ta pasando ta increibel y nunca antes bisto con AVP ta brasa corupcion pa benificia algun hende enves di bringa corupcion na bienestar di nos Pueblo.

15 mei 2017

Expresionnan haci den e articulo aki no necesariamente ta refleha opinion di ArenaPoliti.co