ORANJESTAD – Manera nos tin e custumber di haci na Aruba, a hisa bandera riba dak y a tene un spantenbier pa celebra cu a yega na e punto mas halto di construccion. Esaki a tuma luga dialuna atardi na Kibaima caminda e proyecto Smart Construccion ta hayando su cada dia mas forma. Gobierno di Aruba representa pa Minister President Mike Eman y Minister di Energia ing. Mike de Meza a felicita tur e companianan envolvi pa e progreso alcansa den un iniciativa cu lo trece beneficio pa nos isla den diferente tereno.

Awo cu e prome cas ya ta construi, companianan manera FCCA, WEB Aruba N.V., Setar Aruba N.V., Elmar Aruba N.V. hunto cu TNO Caribbean y otronan, por cuminsa instala aparatonan tecnologico cu ta percura pa e ta un vivienda totalmente sostenibel.

‘Ora bo tin un vision asina pa bo pais, ta importante pa bo trece tur e partners cu ta mester haci’e posibel, hunto y mirando den mesun direccion. E por parce un parti hopi chikito di nos pais, pero e ta un parti esencial di e proceso cu nos mester cana pa realisa e soño grandi di haci esaki posibel pa tur hende,’ Premier Eman a expresa.

Smart Community Aruba ta un compleho residencial experimental consistiendo 20 cas cu su enfoke principal ta estilo di bida sostenibel. Den dje lo desaroya, test y demostra solucionnan sostenibel cu ta adapta na e circunstancianan climatologico di Caribe. E obhetivo principal ta pa adkiri conocemento riba e solucionnan tecnologico y model comercial cu por wordo duplica despues na otro barionan di Aruba y den nos region.

Ta conoci cu tin un interes grandi di hopi compania local y di afo. Diescinco ya caba a firma un MOU cu TNO Caribbean y tin mas ta mustrando interes. E proyecto di Smart Community ta representa e oportunidad di test y un ahusta nan tecnologia specialmente na e clima tropical.

Adicionalmente ta un oportunidad pa profesionalnan local amplia nan conocemento den e materia. Minister de Meza a haci peticion na companianan local pa traha hunto cu scolnan tecnico pa brinda studiantenan Arubiano e chens di wak di cerca e instalacion y aplicacion di e solucionnan tecnologico.

E bario di Smart Community lo test generadornan di energia di solo y biento, integracion di energia sostenibel den Smart Grids, maneho di awa sushi, entre otro. Tambe ta bay realisa estudionan riba e comportacion di habitantenan pa cu e tecnologianan nobo. Ta calcula pa cu pa fin di 2017 e prome cas lo ta cla pa wordo habita. 

Expresionnan haci den e articulo aki no necesariamente ta refleha opinion di ArenaPoliti.co