‘Nos lo bin bek riba nan’    

ORANJESTAD – Minister President Mike Eman a ofrece un conferencia di prensa dialuna atardi caminda a comparti e informacion mas nobo di e situacion di ‘oil spill’ na Aruba. Despues di informa e ultimo desaroyonan y gradici tur esnan cu ta aportando, e mandatario tambe a sa di afirma cu tin otro aspectonan cu ta conta cu e atencion di Gobierno. Eman a indica cu ta bay atende cu nan debidamente den un proximo fase, un bes cu e situacion normalisa, pero cu sigur lo bay enfoca riba e responsabilidad di e susedido y tambe riba preparacion y prevencion den e industrianan local.

“Tin hopi pregunta cu ta lanta rond di henter e tema aki cu por ta nos tin cu bin bek riba nan den futuro. Na e momento aki nos kier concentra riba e aspecto logistico y kico nos tin cu haci pa haci e areanan limpi. Temanan un tiki mas internacional di responsabilidad, di paisnan cu ta maneha e volumen aki di crudo, cu por cambia e destino di un pais di un dia pa otro; por ta esaki ta un momento atrobe cu toch comunidad mester para keto y pensa riba e tema aki den un sentido mas fundamental,” Premier Eman a declara.

“Sigur nos lo bin bek riba e tema aki. Nos por bisa cu esaki por ta un advertencia chikito cu nos por maneha y por ta nos mester tum’e asina y usa e experiencia aki pa tuma precaucion y laga nos bos resona den nos propio pais, unda cu nos tin e temanan aki tambe; paso nos tin un refineria y nos tin exploracion di gas ta bay tuma luga den nos subsuelo panort di Aruba. Toch temanan cu ta haci loke a sosode awe importante pa nos para keto na nan y mira cu nos ta haci lo maximo pa proteha nos pais y futuro generacionnan,” asina Prome Minister a finalisa bisando. 

Expresionnan haci den e articulo aki no necesariamente ta refleha opinion di ArenaPoliti.co