Gabinete Eman mester ta bou di hopi precion. Esaki nos ta conclui despues di mira un circulario di e directora di IBISA den cual e ta recorda e ambtenaren cu nan ta prohibi di expresa nan mes durante y despues di ora di trabou sea verbal of via otro medio di comunicacion, inclusivo social media, tambe Facebook y Whatsapp contra e maneho di su departamento, minister y gobierno. Esaki ta locual nos ta yama un ehempel bibo di e dictadura cu Gabinete Eman ta sembrando na nos Pais. Aruba mester ta liber di tanto manipulacion, persecucion y oprecion.

Manipulacion, persecucion y oprecion na ordo di dia 
Gabinete Eman bou liderasgo di Eman a percura pa manipulacion na grandi di e cifranan di nos Pais. Cifra di finanzas publico, cifra di turismo y cifra di desempleo, tur a wordo manipula of scondi pa asina Pueblo no haya constancia di e mal maneho cu Mike ta hiba na nos Pais. Banda di esaki Eman y su bende a percura pa persigui tur hende cu ta pensa otro. No lubida con Baba cu ta buikspreker di Mike tabata grita den Parlamento cu mester haci Gobierno MEP Proof. Awor a bay mas lew door di prohibi tur ambtenaar pa expresa nan mes contra e mal maneho di e Gobierno di AVP durante y despues di ora di trabou. Di e manera aki Mike via e directornan di departameto di Gobierno kier oprimi e ambtenaarnan pa nan no reclama of cuestiona e mal gobernacion y prostitucion di nos Pais door di Mike y su bende. Esaki ta dimas. E wega aki di silencia hende di e forma aki no ta cuadra den un Pais na unda democracia mester reina.

Libertad di exprecion mester wordo respeta 
E circulairo aki ta muestra cu Mike y su bende ta bou di hopi precion. Nan ta perdi y pesey ta recuri na menasa e cuerpo di empleado publico pa asina via nan e Pueblo en general no haya sa di e abusonan cu su Gobierno a y ta haci cada dia cu pasa. Pero Pueblo di Aruba no mester sigi permiti e locura peligroso aki. Nos no por sigi permiti pa Mike oprimi y dividi nos Pueblo asina. Libertad di exprecion ta un derecho fundamental y no por wordo limita djies pasobra cu Mike a faya den goberna drechi. Libertad di exprecion na nos Pais mester wordo respeta. Pesey dia 22 di September 2017 nos ta urgi e empleado publico pa manda Mike y su bende cas cu nan voto contra AVP.  

11 juli 2017

Expresionnan haci den e articulo aki no necesariamente ta refleha opinion di ArenaPoliti.co