Tur partido ta den e ultimo fase di preparacion di nan lista electoral. Segun nos estatutonan nos organizacion politico mester convoca un reunion extraordinario di miembronan pa aproba e lista electoral, cu lo keda presenta dia 4 di augustus na Conseho Electoral. E reunion aki lo tuma lugar dia 30 di juli na ATIA Building na Dakota y lo cuminza exactamente 2or di atardi. Diadomingo awor nos lo ta for di 8or di mainta na nos sede na San Nicolas pa atende tur pregunta cu por tin tocante eleccion 2017. 

Dia 29 di juli proximo nos candidatonan lo firma e Gentlemen's Agreement, cu ta stipula: “Pa RED Democratico e secuencia riba lista no ta di importancia: Cual sea e posicion riba lista, ta e candidato(nan) cu a adkeri mas voto personal lo cubri e asiento den parlamento. Mi ta priminti for di awor cu despues cu resultado final di eleccion ta stipula pa Conseho Electoral, lo mi respeta e declaracion firma aki, y ,si acaso tin otro candidato despues di mi posicion riba lista cu a adkeri mas voto personal cu ami, lo mi cede mi derecho riba e asiento cu pa ley mi lo por tin derecho riba dje.” 

Mester cambia nos “kiesverordening” pa keda hancra den ley cu esun cu haya mas voto ta esun cu tin derecho di drenta Parlamento. Esei ta mas democratico. Tambe mester cambia nos “kiesverordening” pa e partido cu no logra e cantidad di voto segun e kiesdeler toch e tin derecho riba un “restzetel”.  Esei tambe ta mas democratico. Na 2005 partido MEP a haya 10 asiento y ta danki na e restzetel a logra 11 asiento y a forma un gobierno absoluto. Na 2009 AVP a haya 10 asiento y ta danki na restzetel a logra 12 asiento, y a bira un gobierno absoluto. Na ambos eleccion tabata tin partido cu a haya mas cu 2000 voto y toch a keda afo y e votonan aki ta di un parti grandi di ciudadania, cu a vota pa un otro programa, y toch a end up serca e partidonan tradicional. Esaki no ta democratico. Na Boneiro a cambia e ley cu un partido, cu a logra 75% of mas di e kiesdeler, tin derecho riba restzetel. E cambio aki mester tuma lugar tambe na Aruba pa nos sistema bira mas democratico.

Si bo kier un cambio di berdad, bo mester vota pa ReD, e partido blanco.

Rudy Lampe, candidato lista electoral di ReD

Expresionnan haci den e articulo aki no necesariamente ta refleha opinion di ArenaPoliti.co