Gabinete ME II: IMF ta elogia y sostene gobierno di Aruba pa loke ta e reformanan grandi haci den tres fondo publico
AOV, APFA y AZV por sigui existi danki na e reformanan aki.
ORANJESTAD - IMF cu nunca ta mucho generoso den duna elogio, pero cu e biaha aki si a complimenta Gobierno di Aruba pa un trabou bon haci den un analisis constructivo, sin duda ta un ‘schouderklopje’ importante pa pais Aruba y e maneho di su actual gobierno. Cu tin cosnan cu ainda mester wordo haci, ta logico. Pero e base a wordo poni y ta duna muestra di cambionan grandi y positivo. Durante un conferencia di prensa Prome Minister Eman ta amplia riba esaki. “E base riba cual nos a construi, riba cual nos a inverti, e recuperacion economico di nos pais basa riba stimula nos economia, cuminsando cu e reformanan esencial na 2010, 2011 y despues den e siguiente gabinete, e base pa converti ideanan nobo pa crea un diversificacion di nos economia, uno pa uno a wordo elogia y sosteni pa e instituto di mas grandi den mundo financiero cu ta IMF”.
Eman a cita e prome frase di e declaracion di IMF cu ta papia pa su mes. E dobel recesion cu Aruba a recupera di dje ta algo remarcabel. “Hopi pais na mundo y practicamente henter Europa mes no ta recuperando ainda di e crisis mundial, mescos paisnan Aziatico y den Sur America cu ta conoce disminucion den crecemento economico. Merca, e unico pais cu a scoge e mesun modelo cu Aruba, cu pa nos a fungi como inspiracion na momento di caida di nos economia y di locual nos a hereda na 2009, awe ta conoce recuperacion economico.” IMF ta sigui bisa enfaticamente cu no solamente Aruba ta recuperando di e crisis mundial, pero tambe di e shutdown di e refineria.
Den su declaracion IMF ta premira cifranan impresionante y importante di economia di Aruba na 2015 basa hustamente riba e vision di inversion di pais Aruba. Eman a duna un palabra special di gradicimento na e partnernan social den Dialogo Social. “No tabata facil pa nos partnernan den Dialogo Social pa hunto tuma decisionnan importante pa e reformanan haci den AOV, den APFA y den AZV. Decisionnan grandi mester a wordo tuma riba edad di pensioen, riba aumento di prima di AOV, di bay pa eindloon pa middelloon di APFA y bin cu un franchise y pa na 2014 aumenta e edad di pensioen tambe paralelo na esun di AOV na 65 aña. Desicionnan grandi a wordo tuma aña pasa tambe pa introduci un healthtax pa AZV pa yuda reduci e contribucionnan cu gobierno di Aruba tin cu haci na e fondo di AZV.”
IMF ta elogia e reformanan grandi cu gobierno a haci y ta bisa cu gobierno ta enfoca den yega na un surplus na 2018. Eman ta masha satisfecho di e forma positivo cu IMF ta señala con e reformanan a tuma lugar. “Esaki ta un reconocimento hopi grandi di locual Aruba a haci den un corto tempo pa reforma tres fondo cu cada un lo tabatin consecuencia sumamente negativo riba finanzas publico si nada a wordo haci. IMF ta dedica hopi atencion den e declaracion aki y den e rapport cu aki algun luna lo keda cla, IMF ta bay den mas detaye entre otro riba e pensioen general cu tambe a keda introduci.”
Expresionnan haci den e articulo aki no necesariamente ta refleha opinion di ArenaPoliti.co