Den cuadro di Dia Internacional di Hende Muher dia 8 maart Lider di MEP Evelyn Wever-Croes hunto cu un delegacion di partido MEP a duna un reconosemento na sra Glenda Croes pa tur e anjanan cu e tabata un sosten pa fundador di partido MEP sr Betico Croes. Danki na su sosten incondicional Betico a funda e partido y por a hiba e lucha maximo pa nos pais cu a culmina den nos Status Aparte. Durante e bishita e politiconan di MEP por a scucha hopi anecdota bunita di Betico.
Como hende muher ehemplar y pa tur locual el'a hasi pa partido MEP el'a wordo honra cu e reconosemento bunita aki den cuadro di dia Internacional di Hende Muher. Presente na e ocasion aki tabata famia di sra Glenda Croes y di parti di MEP Evelyn Wever-Croes, Xiomara Ruiz-Maduro, Setty Christiaans-Yarzagaray, Joally Croes. Ta bunita pa mira partido MEP mustrando aprecio pa e hende muhernan ehemplar cu a hasi asina tanto pa e partido y pa e pais Aruba.

Expresionnan haci den e articulo aki no necesariamente ta refleha opinion di ArenaPoliti.co