Pueblo di Aruba, anteriormente mi a publica con sr. Mike Eman supuestamente ta promoviendo e economia di Aruba. Sr. Eman ta fia placa y crea proyecto, pa despues laga e propio pueblo di Aruba paga pa e debe. Awor loke ta mas horible di e forma di stimula economia di sr. Eman ta cu e proyectonan cu su persona ta trece, ningun NO ta bay trece placa den caha di gobierno y ni placa den saco di e pueblo di Aruba. Aki ta e pueblo (abo) mes ta bay paga pa e economia y no sr. Mike Eman! Pa locual ta trata e Green Economy, esaki ta un fantasma, un halucinacion, un fatamorgana di sr. Eman e ta. Un punto cardinal cu sr. Eman continuamente ta laga sin menciona,  ta e PRICE-TAG (prijs/cuanto placa) di e proyectonan Green! Pret ta pa tende sr. Theo Croes di Arubus NV, splica na radio cu e proyecto di Green Bus NO POR bay door pa motibo di e cantidad di placa cu tin mester pa esaki. Contrario na tur sr. Croes su disparatenan duna na prensa tocante e caso di hacker, esaki SI ta un berdad. Awor, con ta posibel cu Green ta mucho caro pa Arubus NV, pero pa ARUBA NV si esaki ta barata y posibel? Pasobra ta sr. Eman ta manager di ARUBA NV? Anto ta e shareholdernan,  kendenan ta e habitantenan di Aruba, ta nan tin cu paga pa e ideanan di sr. Eman, cu nan ta di acuerdo cu ne, si of no!  Mas comico ainda ta, e echo cu sr. Eman ta cana bisa henter mundo di su plan di 2020, pero keto bay sin bisa e PRIJS cu ARUBA tin cu bay paga! Hasta un galardon Aruba ta gana na Europa pa motibo di e ideanan di sr. Eman cu no tin un suma mara na dje. E di dos punto cu mester trece padilanti cu ta keur af sr. Eman su metodologia relaciona cu economia, ta e ultimo relato di CFT. Den e relato aki, CFT ta declara cu gobierno di sr. Mike Eman a scoge e metodologia di subi e Deficitnan (tekort) presupuestario enormemente, gastando mas placa cu tin den caha y sperando cu e accion aki por trece e presupuesto di e añanan venidero den un balansa! Aki ta unda sr. Eman a dal su dede te bula e huña. E bobedad aki ta haci mi corda e dicho: “Nunca kere, pasobra bo ta kere cu ta un biento bo tin, contrario, b’a susha tur bo paña!”. Esaki ta loke CFT ta bisa Mike tambe. E averahe di e Deficitnan (tekort/placa gasta di mas) di 2011-2014 tabata 8.4% di nos GDP, siendo cu e averahe di e crecemento economico over di e mesun periodo aki tabata solamente 2.2% anualmente. Pueblo por lesa y compronde cu e porcentahenan ta leu for di otro? Alaves e maneho aki a hiba na e echo cu e Debe Nacional di pais Aruba a subi bay te na 80% di e GDP. Aki ta unda sr. Eman a susha tur su paña door di kere cu masacrando e credibilidad financiero di Aruba, lo bay crece e economia satisfactoriamente. Pa pone e cherry riba e bolo di lodo di sr. Eman, CFT ta comenta cu hinca mas placa den tempo di dificultad economico por mustra sabi (wise) pero, si ta den forma di inversion y no den gasto! Den caso di gobierno di sr. Mike Eman, a hinca mas tanto placa den gasto di salario y interes. E gastonan aki no ta genera placa bek den caha, alcontrario, nan ta mustra di ta creciendo cada aña pa motibonan presupuestario di e propio gobierno. Locual cu gobierno di AVP mester haci ta corta den e gastonan di gobierno y trece e debe nacional na un nivel sano manera tempo di gobierno di MEP na 2009, segun CFT. Tambe recobra e confiansa financiero y crea beneficionan fiscal atractivo (belasting) pa inversionan na Aruba, cualnan Aruba tin gran necesidad di nan tambe. Pueblo, bo por compronde awor cu sr. Mike Eman a scoge e caminda robes y ta perdi, sin por haya su caminda bek pa cas!? Conclusion: Sr. Mike Eman no sa nada di loke ta trata con pa stimula economia di su pais, sino solamente a gasta placa cu no ta di dje y di faborece financieramente su amigonan di campaña político. (Prueba mi otro!)

Expresionnan haci den e articulo aki no necesariamente ta refleha opinion di ArenaPoliti.co