ORANJESTAD - Diabierna mainta 42 profesional di diferente departamento manera, Departamento di Recurso Humano (DRH), Melding Ongebruikelijke Transacties (MOT) y Centrale Accounting Dienst (CAD) a huramenta oficialmente como ‘ambtenaar’ den presencia di Minister di Finanzas, Angel Bermudez y demas director di e departamentonan respectivo.

Durante ultimo añanan por a tuma nota cu en berdad e proceso aki unda cu oficialmente ta huramenta e profesionalnan como empleado di Gobierno ta un trayecto cu basta retraso, pues e mandatario a haci enfasis riba e huramentacion aki y cu importancia pa esunnan cu ta labora den Gobierno.

“E huramentacion cu bo lo mantene grado halto di integridad den servicio di Gobierno eigenlijk mester sosode ora bo ta drenta den servicio, pero pa diferente motibo di burocracia esaki a ta tarda masha hopi mes cerca nos na Aruba. Mi ta contento si cu nos a cuminsa cu e prome grupo aki pa asina e procedura aki ta completo y den e simannan venidero nos por sigui cu e otro gruponan di e otro departamentonan”, asina e mandatario di finanzas a expresa.

Na mes momento Minister Bermudez como tambe e directora di DRH, Sra. Omayra Lares ta spera di por finalisa cu e 200 huramentacionnan di e funcionario di Ministerio di Finanzas y Organisacion Gubernamental cu ainda mester tuma luga.

Minister Bermudez ta desea tur funcionario di DRH, MOT y CAD cu a huramenta diabierna ultimo tur clase di exito de nan funcion y pa nan sigui eherce nan trabou cu sano huicio, integridad y cu un consenshi profesional.

Expresionnan haci den e articulo aki no necesariamente ta refleha opinion di ArenaPoliti.co