Nos a traha duro pa e turista yega Aruba y awor nos ta cla pa e siguiente nivel 

Minister Otmar Oduber a indica cu mester percura cu pa nos Producto Aruba ta cuadra of ta mas cu e expectativa di nos bishitantenan. E ta enfatisa cu di parti Gobierno di Aruba ta invertiendo hopi pa eleva e calidad di Producto Aruba y ATA tambe ta percura pa sigui inverti no solamente den  e producto pero tambe den e servicio. Un parti importante sigur ta e amabilidad di nos hendenan. Den cuadro di esaki ta bay tin diferente programa cu ta iniciando dentro di poco.

Dentro di poco lo por mira algun borchi nobo den centro di ciudad, pa guia nos bishitantenan y easki ta parti di e aspecto di duna bon servicio. E programa di Aruba Certificacion Program, bou di oficina di turismo, ta haya un bachi nobo. A compromete cu hotelnan, a base di e rapport di RevPar, cu pa e proximo 2 añanan, lo no solamente continua pero kier logra 100% di certificacion pa tur esnan cu ta labora den e industria turistico. Servicio ta di suma importancia pa e industra aki y especialmente pa e calidad di turista cu nos kier atrae. Pesey tambe kier cuminsa traha mesora riba e di 2 programa di ACP, pa esnan cu a pase 1 pa 2 aña pasa, den e añanan nos dilanti por tin un modelo nobo cu ta continua cu e Aruba Certificacion Program. Minister Oduber ta kere cu mester sigui mehora e conocemento cu tin pa di e forma ey transmiti e mihor servicio cu ta posibel.

Den cuadro di e pensamento aki na mitad di luna juni ta inicia un campaa di concientisacion nobo hunto ATA. Ainda ta fresco den nos memoria e exitoso campaña di “Mi Compromiso”. “Den tur skina hende tabata sinti e importancia, e orguyo, di ta comprometi cu e destinacion cu nos tin.” e mandatario ta comenta. Dia 15 di juni por spera un otro proyecto di concientisacion conhuntamente cu oficina di turismo, cu lo ta den e mesun direcion cu esun di “Mi Compromiso” cu e intencion pa envolvi henter pueblo di Aruba.  Campaña lo no enfoca solamente riba esnan laborando den e sector turistico, pero cada un persona den nos comunidad cu e amabilidad cu nos ta conoci p’e.

Minister Oduber a finaliza bisando,  “Mi ta kere e ta bay ta un programa di concientisacion pa tur hende cu ya caba a compromete cu otro pa nos pais, awor ta bay tin “Bo Parti” como ciudadano cu bo lo tin cu bay contribui cu ne. Mi ta invita pueblo di Aruba keda pendiente pa esaki y forma parti di dije. Cada un di nos lo mester bay concientisa tur hende rond di nos, te hasta e chikitonan cu ta lanta, pa sa e importancia cu turismo tin pa nos awe y pa futuro”.

Expresionnan haci den e articulo aki no necesariamente ta refleha opinion di ArenaPoliti.co