MEP: E unico partido cu pa decadanan largo a neglisha e pueblo di Noord ta AVP. Noord te ainda ta wardando riba su scol di HAVO/VWO!
![FraccionMEP03](/images/779x490/FraccionMEP03.jpg)
Negligencia y tempo scur
Den un comunicado skirbi door di esnan cu ta wordo paga miles di florin pa luna pa haci show y propaganda pa partido AVP ta ser bisa cu durante decadanan largo e pueblo di Noord a ser neglisha y cu awor porfin e pueblo aki lo bay haya su edificio di MFA. Tambe e manipuladornan aki a papia di un tempo scur cu ta tras di lomba pa e pueblo di Noord. Mira ken ta papia di negligencia y di tempo scur! Ta parce cu pa decadanan largo e manipuladornan aki no a biba den e pueblo di Noord pa nan experencia pa nan mes ta cual partido a neglisha y maltrata malamente e pueblo durante tur e decadanan aki.
AVP no a haci nada pa Noord
Durante 1986-1988, 1994-2001 y 2009-2015 cu partido AVP tabata y ta den gobierno net nada a ser haci pa e pueblo di Noord y awe cu nan gran hipocrecia nan ta broma y haci show cu porfin nan a logra UN (1) proyecto pa Noord, esta e edificio di MFA. Hecho ta cu durante tur e gobernacionnan di AVP, e pueblo di Noord no a haya ningun scol construi, ningun cancha deportivo construi, ningun edificio di gobierno construi, ningun cas social construi y ningun warda di polis construi. Ta solamente un parke di molina na Urirama nan kier a bin cu ne p’asina desgracia e bienestar y salud di e habitantenan di Noord.
Kende no ta corda den ki estado e gobierno di AVP a laga e cancha deportivo di Noord Sport Club na Shaba na 2001? Hecho ta cu e tempo ey nan a converti henter e area aki den un dump publico, caminda djaca, raton, muskita y cacalaca tabata haci fiesta cu e pueblo aki.
Alavez no mester lubida con na 2009 e gobierno di AVP a haya un plan, mapa, bestek , sitio di construccion y financiamento completamente cla pa construi un scol HAVO/VWO den Noord. Pero kico nos por a mira? Partido AVP a coy e plan, mapa y bestek tira tur den bari di sushi y cu e placa cu nan a ranca for di e scol di Noord nan a bay cumpra e tramnan di locura pa supuestamente acomoda y satisface e turistanan crucero den Playa. Esaki si nos ta yama un negligencia y maltrato total di nos mucha y studiantenan di Noord door di partido AVP!
Algun logro di MEP
Historia por comproba cu e unico partido cu realmente a realisa un gran cantidad di proyecto cu prioridad halto pa e pueblo di Noord tabata MEP cu construccion di tur e casnan di pueblo, Hulpbestuurskantoor Noord, Centro di bario Noord, Plan Sasaki pa structura henter e area turistico, Compleho deportivo Frans Figaroa, Sporthotel, iluminacion pa varios cancha deportivo, Warda di Polis nobo, scol basico na Kudawecha, Centro di Pesca Hadicurari y construccion di e gran mayoria di e hotelnan den Noord. Ta p’esey mes, si mester mira locual e ignorantenan di AVP ta gaba cu ne awe, esta e unico edificio di MFA pa Noord, nan mester tin berguensa di haci propaganda pa un proyecto cu ta e pueblo mes tin cu bay paga p’e ainda, siendo cu nan partido AVP mes a boycotia un proyecto noble y educativo di un HAVO/VWO scol pa Noord.
![mep 1062015 centrodeportivoff](/images/779x490/mep-1062015-centrodeportivoff.jpg)
![mep 1062015 centrodipescahadicurari](/images/779x490/mep-1062015-centrodipescahadicurari.jpg)
![mep 1062015 complehofransfigaroa](/images/779x490/mep-1062015-complehofransfigaroa.jpg)
![mep 1062015 skoldikudawecha](/images/779x490/mep-1062015-skoldikudawecha.jpg)
![mep 1062015 wardadipolisnoord](/images/779x490/mep-1062015-wardadipolisnoord.jpg)
Expresionnan haci den e articulo aki no necesariamente ta refleha opinion di ArenaPoliti.co